Mga tanod sa Cebu City gi-drug test
CEBU, Philippines — Gipaubos sa surprise drug test ang mga barangay tanod sa 49 ka mga barangay sa Dakbayan sa Sugbo sa mga sakop sa Cebu City Office for Substance Abuse Prevention (COSAP) isip kabahin sa ilang kampanya nga mamahimong drug-free workplace ang Cebu City Government.
Matud sa pangulo sa COSAP Garry Lao nagpatawag siya og meeting sa mga tanod sa tanang low land barangays sa South ug North District sanglit nag-reorient sab siya labot sa proseso sa payroll diin nangayo siya og feedback kung maayo ra ba ang dagan.
Gawas niini, gipahibawo sab sa COSAP nga ang City Council miaprubar na sa ilang hangyo labot sa type A uniforms sa mga tanod. Nagpahinumdom sab ang COSAP sa mga tanod tungod kay naay uban nga mga payrolls nga sayop ang pagkasuwat sa mga pangalan ug nag-update sab ang COSAP labot sa pag-submit sa mga report sa mga tanod.
Nagplano sab si Lao nga mopahigayon og medical check up sa mga tanod diin nakig-alayon siya sa Long Life Medical Assistance Program.
Human niini, gisunod dayon ang drug test sa dul-an usa ka libo ka mga tanod ug kadtong mga wala kagahapon gihatagan og higayon nga makapaubos sa drug test kay ang dili makahimo niini kinahanglang paesplikaron.
“If we will not be satisfied sa ilang explanation I will strike them out para sa atuang financial assistance because part sa giving of financial assistance is maka-undergo sila og drug test,” ni Lao pa.
Ang siyudad sa Sugbo dunay 1,600 ka mga tanod gikan sa 80 ka barangay.
Kon dunay magpositibo sa drug test nga gihimo sa COSAP sila morekomendar nga kini hulipan.
Sa laing bahin, walo ka sakop sa Parks and Playgrounds ang nagpositibo sa parehong drug test. (BANAT NEWS)
- Latest
