Nursing student napili nga Miss Pardo 2018

CEBU, Philippines — Engrande ang nahitabong pagsaulog sa bisperas  sa ilang pista sa mga  Pardohanon gumikan kay hugyaw gyud ang nahitabo nga kalingawan niadtong Septiyembre 21 didto sa Pardo Gym tungod kay 13 ka mga maanyag nga dalaga ang nagsangka alang sa dako nga titulo nga Miss Pardo 2018.

Gipanguluhan ang kalingawan sa aktibo nga Barangay Kapitan sa Poblacion Pardo nga si Kapitan Litang Abarquez ug inabagan kini sa iyang anak nga si Apple Abarquez.

Dakong garbo alang ni Kap. Abarquez nga aktibo ang iyang mga sakop sa buhat aron magmalampuson ang mga kalingawan   alang sa  kapistahan ni Santo Tomas de Villanueva nga mao ang patron sa maong barangay.

Pinaagi sa maong kalihokan,  mapakita sa taga Pardo  kung unsa  ka hugyaw ang ilang abilidad  sa natad sa indigay    ilabi na sa ilang kaanyag ug kautokan.

Nasayran  nga gipangandaman gyud og maayo ang maong show gumikan kay dili basta-basta ang entablado niini.

Sa nahitabong indigay niadtong Biyernes sa gabii, mipatigbabaw gyud ang kabansay ug kaanyag sa ESL teacher ug Nursing student nga si Diane Culaba human niya naangkon ang titulo nga Miss Pardo Universe 2018.

Si Diane naggikan sa Basak Pardo. Maingon nga back to back ang nahimong kadaugan sa maong dapit human nga nakoronahan si Janna Fernan sa miaging gabii  isip Queen of Pardo 2018  nga gikan usab  sa maong lugar.

Ingon nga total package na si Culaba gumikan kay nataypan sa mga hurado ang istilo sa iyang pagpaso ug nahatagan usab niya og husto nga tubag ang pangutana nga “What is the greatest lesson that the people from older generation can learn from the millenials?”.

Sa tubag ni Culaba, gibase kini niya sa iyang kasinatian kon unsa ang makahatag niya og kalipay aron magmalampuson sa iyang kinabuhi.

Matud pa niya nga sulod sa taas nga katuigan,   ganahan ang  iyang amahan   nga mokuha siya sa kursong HRM, apan dili siya ganahan niini.

Nursing gyud ang iyang gikuha sanglit mao man kini ang duol sa iyang kasing-kasing   , bisan paman nga medyo mahal ang maong kurso.     Dako hinuon og tabang kaniya ang iyang pagka- ESL teacher.

Suma pa niya nga sa pagpili og kurso, kinahanglan pilion  gyud kung unsa ang imong gusto, aron dili  ka magmahay sa umaabot nga mga adlaw.

Dako hinuon ang iyang pasalamat ngadto sa iyang pamilya sanglit   nihatag kini og suporta sa iyang desisyon.

Gawas sa maong dakong titulo, naangkon sab ni Culaba ang mga award nga Best in Funwear, Best in Evening ug Online People’s Choice Awards.

Mao kini ang kinatibuk-ang mananaog sa nahitabong koronasyon sa Miss Pardo 2018:

Winners:

Miss Pardo 2018 - Diane Culaba

Second Runner-Up - Nichole Adan

First Runner-Up - Via Mendoza

Miss Pardo International - Cherry Mae Geraldez

Miss Pardo World - Noriel Olaco

Miss Pardo Universe - Diane Culaba

Special Awards:

Miss Globe - Claire Zapanta

Miss Beauche International - Kea Arana

Miss BioEssence - Noriel Olaco

Miss Skin 911 - Via Mendoza

People’s Choice Award - Noriel Olaco

Online People’s Choice Award - Diane Culaba

Miss Talent - Christy Sangutan

Miss Photogenic - Claire Zapanta

Best in Production Number - Cherry Mae Geraldez

Best in Think Local Costume - Cherry Mae Geraldez

Best in Funwear - Diane Culaba

Best In Evening Gown - Diane Culaba