Liboan ang nihatud kang Blanco

CEBU, Philippines — Dul-an singko mil ka mga tawo ang nihatud sa lubong ni Ronda Mayor Mariano Blanco III kagahapon sa hapon nga tanan nanawagan og hustisya sa gidangatan sa amahan sa ilang lungsod.

Ang mga kabanayan ug kahigalaan ni Blanco nagsuot og mga sinina nga may nakaprintang “Ronda love Mayor Nonie” ug “Justice on its own is not enough”, isip pagpakita sa ilang pagbangotan sa linuog nga pagpatay kaniya. Hasta ang Bandila sa Pilipinas diha sa lungsod gibutang sa half-mast.

Si Blanco gipatay sa upat ka wala pa gihapon mailhing mga lalaki diha mismo sa opisina niini sa sulod sa munisipyo. Ang mayor diha na magkatulganan sa iyang opisina sukad nga nagsige og kadawat og mga hulga sa iyang kinabuhi.

Niadtong tuig 2018, si Blanco usa sa mga gipangalanan ni Presidente Rodrigo Duterte nga usa sa mga narco-politicians dinhi sa Sugbo, butang nga iyaha kining gihimakak sa buhi pa kini.

Matud pa sa bag-ong hepe sa kapolisan sa Ronda nga si Police Inspector Renato Albuera nagbutang sila og mga polis sa palibot sa Our Lady of Sorrows Parish ug rota nga giagian sa naghatud kang Blanco aron dili madelatar ang kalihokan.

Ang Special Investigation Task Group Blanco hangtud karon wala pay nakuhang lead sa ilang imbestigasyon tungod kay ang duha ka testigos nga gipahapa sa mga mamumuno diha sa munisipyo sa dayon nilang saka sa opisina sa mayor, wala na nila igkita karon.

Gituohang nabalaka ang duha sa ilang seguridad. Ang kapolisan padayong nagsusi sa posibleng mga motibo nga naglakip sa politika, illegal nga drugas ug nakaaway sa mayor.

Walay sakop sa media nga gitubag sa mga kabanay ni Blanco dihang gikuhaan unta sila og pamahayag.

Ang acting mayor karon nga si Rocky Gabatan miingon nga ilang suportahan ang pamilya ni Blanco sa tinguha nilang modangop og laing buhatan aron maoy maghimo sa imbestigasyon gawas sa kapolisan.

Si Police Superintendent Janette Rafter, ang tigpamaba sa  SITG Blanco miangkon nga naglisod gyud sila karon paghimo sa imbestigasyon apan masaligon sila nga dako og matabang kon mokooperar kanila ang pamilya sa mayor. (BANAT NEWS)