Nikatap nga taho kabahin sa bagyo nakahatag og kabalaka

CEBU, Philippines — Mga unverified report diha sa social media kabahin sa bagyo nga mosulod sa nasud nakahatag og kabalaka  sa katawhan.

Sa mga nikatap diha sa social media giingong mamahimong “super typhoon” ug posibleng magdala og grabeng impact sa nasud ang mosulod nga bagyo.

Si Alfredo Quiblat, Jr., officer-in-charge sa Philippine Atmospheric Geophysical and Astronomical Services Administration (PAGASA)-Cebu nihimakak nga nipagawas og advisory ang ilang buhatan nga ang bagyong Mangkhut (international name) posibleng mamahimong super typhoon.

Ang bagyong Mangkhut nasigpatan niadtong Lunes sa gilay-on nga 2,440 kilometros sa sidlakan sa habagatang bahin sa Luzon ug  posibleng mosulod sa Philippine Area of Responsibility (PAR) karong Miyerkules sa gabii o Huwebes sa buntag ug tawgon nga bagyong “Neneng.”

Dugang ni Quiblat nga dunay unverified reports nga nikatap sa social media ug tungod niini nakahatag kini og kabalaka sa katawhan.

Sa laing bahin, ang Provincial Disaster Risk Reduction and Management Office (PDRRMO) nipahimangno sa publiko nga dili mokompiyansa hilabina sa mga nagpuyo diha sa mga lugar nga bahaonon ug delikado sa dahili sa yuta.

Si Julius Regner sa PDRRMO nagkanayon nga ang matag pamilya angayan nga adunay kaugalingon nga pangandam ug dili magsalig sa mga local chief executives ug mga local disaster offices.

Ang PDRRMO adunay na-identify nga mga lugar nga delikado sa baha ug pagdahili sa yuta diin gipaalerto na nila ang mga local disaster team sa maong mga lugar.

Matud ni Regner nga kon kusog ang ulan sa lugar maayo nga mobakwit na lang ang mga residente aron malikayan ang disgrasya. (BANAT NEWS)