Escort ni Eddiegul apil sa narelibo
CEBU, Philippines — Bisan ang police escort ni Talisay City Mayor Eduardo Gullas ang nalakip sa girelibuhan nga kapolisan sa siyudad.
Si Gullas niingon nga duha niya ka police escorts ang lakip nga ni-report na sa Lungsod sa Sibonga alang sa re-training ug uban pa.
Siya nagkanayon nga wala na siya’y mahimo niini tungod kay mando man sa ilang labaw ang ilang pagbalhin sa assignment. Apan si Kongresista Gerald Anthony “Samsam” Gullas wala maapektuhi niini kay pabilin ra man ang iyang police escort.
Matud pa niya nga ang kalambuan sa kapolisan sa Siyudad sa Talisay iya gyud sa kadagkuan sa Police Regional Office-7 ug siya nagtuo nga nahibawo sila sa ilang gibuhat aron adunay nindot nga resulta sa ilang kampanya batok sa ilegal nga drugas.
“They are the officials and they know what they are doing,” asoy pa ni Gullas.
Siya nitataw nga kongresista siya sa unang distrito ug mao kini ang iyang gipaningkamutan nga hapsay ug malinawon ang lugar nga iyang gialagaran maong andam siya sa pagtabang sa kapolisan kutob sa iyang mahimo. (/GMR)(BANATNEWS)
- Latest
