Upat ka van nga bombay ug mansanas gipangsunog

CEBU, Philippines – Sulod sa upat ka container van nga mga sibuyas bombay ug mansanas nga mobalor ngadto sa P500 mil ang gisunog kagahapon sa buntag human nga kini nangalata.

Ang maong mga container van nga gisudlan sa nahisgutang mga produkto giabandonar kini sa gipadad-an niini dinhi sa Sugbo human masakpi sa Bureau of Customs nga misdeclared kini.

Ang maong mga kargamento gikan sa nasud sa China ug kagahapon nitangkod na kini nga upat ka buwan nga niabot nganhi sa Sugbo.

Giingong ang nagpadala niini nideklara nga mga prutas apan sa pagsusi sa inspector sa BOC kadaghanan niini mga dagkong sibuyas bombay.

Ang consignee sa maong mga produkto napasakaan na kini og kaso nga misdeclaration ug tungod kay wala gyud mopatim-aw ang consignee hangtud niadtong Hulyo 18, 2018 ang korte nihatag og pagtugot nga abandonado na ang maong mga cargo.

Ang nahisgutang mga lamas ug prutas nangalata na kini hinungdan nga dili na kini ma-auction ug gipaubos na sa thermal destruction.

Matud ni Elmer Bailio, chief sa Auction and Cargo Disposal sa BOC-7 kasagaran ideklara sa mga i-import nga prutas o lamas ang mansanas walay buhis nga bayranan.

Ang pagsunog sa 5,000 ka kilong mansanas ug sibuyas bombay gipahigayon diha sa Retro Chemical Industries sa Purok Tambis, Barangay Umapad sa Dakbayan sa Mandaue.

Dugang ni Balilio nga bisan kon gisunog na ang maong mga cargo aduna gihapoy tulobagon ang consignee. (/BDB)(BANAT NEWS)