P6.5M shabu nasakmit

CEBU, Philippines — Gibana-banang P6.5 milyones ang kantidad nga nakuha sa gituohang shabu atol sa usa ka buy-bust operation kagahapon sa buntag sa Barangay Sambag 2 ning Dakbayan sa Sugbo.

Ang operasyon gipahigayon sa Drug Enforcement Unit sa Police Station 2 nga gipangulohan ni Inspector Gomersendo Mandawe  nga may koordinasyon sa PDEA-7.

Ang suspetsado giila nga si Reinhard Moreno, 29,  taga Upper Kawayan sa nahisgutang barangay.  Lakip nga nakuha gikan sa suspetsado mao ang usa ka gamay’ng pakete, lima ka dagko nga bulto nga gituohang shabu ug P12 mil nga kwarta nga gituohang halin sa iyang ilegal nga drugas.

Matud ni Police Chief Inspector Atty. Maria Theresa Macatangay sa Police Station 2, nadakpan na kining maong suspetsado niadtong tuig 2016 sa kaso nga possession of nubain ug niadtong 2017 sa kaso nga possession of drug paraphernalia.

Dugang ni Macatangay nga adunay bag-ong modus ang mga drug pushers ug drug users karon tungod kay ang transaksyon pinaagi na sa social networking sites.

Samtang nakaeskapo ang gikatahapang drug pusher sa Ibabao Estancia, Dakbayan sa Mandaue sa miaging gabii nga si Orland Sambelad apan nakuha gihapon sa balay niini ang shabu nga nagkantidad og P50 mil

Si  Senior Inspector Troy John Lalamunan sa Mandaue City Drug  Enforcement Unit  sa Mandaue City Police Office (MCPO) miingon nga anha sa sulod sa ilang panimalay magpahigayon sa ilegal nga kalihokan ang suspek apan wala kini diha sa pagronda sa kapolisan.

Nadakpan usab sa kapolisan sa Presinto 6 sa MCPO si Arnel Maloloy-on nga nakuhaan og usa ka .22 magnum revolver   ug pinaketeng        shabu.

Laing nadakpan human gialarma sa kapolisan ang nahitabong kagubot sa Purok Acasia, Sitio  Looc, Barangay Poblacion, Lungsod sa Liloan  ang  nakuhaan usab og kutsilyo ug pakete nga shabu. Ang suspek mao si Oscar Jarolan, 35.

Usa ka 18-anyos nga nailhang si Kevin Reuyan alyas Jason Reuyan ang nadakpan sa Oplan Limpyo ‘Lacion sa may Poblacion Occidental sa Lungsod sa Consolacion niadtong Domingo sa gabii tungod sa nakuhang pinutos sa ginadiling drugas.

Ang maong dinakpan pasakaan og kasong paglapas sa RA9165. Kenna Kyla G. Calizar (BANAT NEWS)