Simbahan dili ipa-demolish sa mga lumad

CEBU, Philippines – Nahimong problema karon sa kagamhanan sa Dakbayan sa Lapu-Lapu ang gitinguha nga paghawan sa mga ilegal nga estraktura nga nahimutang sa tulo ka metros nga gilay-on sa Mactan Channel.

Kini human nga ang mga opisyal sa Seo-Jong New Life Church nga usa ka Born Again Christian Church nga natukod diha sa Barangay Pajo niadtong 2014 ubos sa pag-abag sa DAIL Community sa South Korea kinsa ang mga sakop niini mga lumad nagdumili sa pagbiya sa lugar.

Nunot sa maong pagdumili si Datu Edgardo Luardo, chieftain sa Tribu ni Datu Mapaubsanon ang nipadayag og reklamo sa kamanduan ug nagkanayon nga aduna silay mga katungod isip mga sakop sa Indigenous   Peoples diin gipanalipdan ang ilang katungod ubos sa Republic Act 8371 o Indigenous Peoples Right Act of 1997 diin sila ubos sa ilang pangagamhanan nga pinasubay sa ilang kultura nga gisunod sa ilang katigulangan.

Gibase nila ang ilang mga pagpangangkon sa mga dokumento nga giluwatan sa Tribal Government dinhi sa Pilipinas diin ubos sa Office of the Customary Tribal Building Official sa maong dakbayan.

Gitataw sa kadagkuan sa simbahan nga ang ilang gitukod nga building sa maong lugar adunay kaugalingong septic tank ug higpit nilang gibantayan ang pagpanglabay og mga basura diha sa maong lugar. (/BDB)(BANAT NEWS)