Resort casino giilog

CEBU, Philippines – Nitumaw ang tensiyon sa Mactan Isla Resort and Casino sa Agus, Dakbayan sa Lapu-Lapu kagahapon sa kaadlawon.

Kini human usa ka Koreano nga naila lang nga si Mr. Park ang nagdala og armadong mga tawo ug nisuway og take over sa maong establisemento bisan padayon pa nga gihusay ang kaso niini.

Giingong namugos pagsulod sa nahisgutang establisemento ang armadong mga tawo kinsa luwan sa puti nga van nga pulos nagsul-ob og itom hinungdan nga naalarma ang mga guwardiya.

Matud sa director sa Lapu-Lapu City Police Office, Senior Supt. Lemuel Obon, nga gidis-armahan sa mga armadong tawo ang mga guwardiya hinungdan nga nahitabo ang pagpamusil nga nakaangol sa usa sa mga guwardiya kinsa naigo sa dughan ug dali nga gidala sa tambalanan.

Matud ni Obon nga ilang gidala sa LCPO Headquarters ang nalambigit nga mga guwardiya alang sa imbestigasyon.

Nasakmit sa kapolisan ang nagkadaiyang kalibre sa mga armas nga naglakip sa pito ka shotgun, upat ka kalibre .38, tulo ka KG9 nga armas ug uban pa.

Sa laing bahin, alas 9 pasado sa buntag kagahapon ang Bureau of Internal Revenue (BIR) nipasirado sa operasyon sa EGI Cebu Inc., usa ka hotel sa Barangay Maribago, Dakbayan sa Lapu-Lapu.

Kini tungod sa kapakyas sa pagbayad sa buhis sulod sa pipila na ka tuig nga nakalabay.

Ang closure order nga gipadala sa Commission on Audit (COA) gipirmahan ni Arnel Guballa, Deputy Commissioner on Consumer Operation sa BIR. (/GMR)(BANAT NEWS)