30 ka tawo nasikop sa Lapu-Lapu

CEBU, Philippines — Gidakop sa kapolisan ang  30 ka tawo nga nakalapas sa gipatuman sa mga ordinansa sa kagamhanan sa Dakbayan sa Lapu-Lapu ug usa ka suspetsado sa pagpanulis sa follow up operation sa dalan S. Osmeña, Barangay Gun-ob, sa maong dakbayan. Si Senior Police Officer 1 Mear Acebron sa Presinto 5 sa Lapu-Lapu City Police Office (LCPO) miila sa ilang nadakpan nga si Arjie  Cañete, 24, kinsa gitumbok nga maoy nitulis kang Eljon Carillas, 21.

Matud pa nga naglakaw ang biktima diha sa lugar dihang gitaparan sa suspek ug gitionan og kutsilyo ug mideklarar og tulis, gikuha sa suspek ang  cellphone ug salapi sa biktima.

Daling nisibat palayo ang suspek apan nalabyan kini sa nagpatrolyang mga polis sa Station 3 nga diin gipasakay na diay ang biktima nga bag-ohay lang nilang nalabyan hinungdan sa pagkasikop niini.

Si Acebron miingon nga sa ilang pagpatrolya nianang gabii sa adlaw nga Domingo 30 ka tawo nga nakalapas sa lain-laing ordinansa  ang ilang gisita apan gihatagan og higayon nga makapauli dungan sa pagsaad nga di na sila mousab.

Ang 22 niini nag-estambay daplin sa karsada, duha ang naghukas sa ilang sapot sa itaas ug unom  ang naaktohang nanigarilyo sa publikong lugar ug tulo ka menor nga naglaroy-laroy ang ilang gihatud sa ilang panimalay ug gipahimangnoan ang mga ginikanan.

Matud ni Acebron nga sa unang kalapasan sa ordinansa ilaha lang unang pasayloon apan sa sunod ilaha na silang prisohon aron pamultahon.

Sa Barangay Tanke, Dakbayan sa Talisay nasikop sa checkpoint niadtong Domingo sa gabii sila si Arthchie Lines, 31, taga Balud Crossing, Lungsod sa San Fernando ug si Ronnie Cuyos, 22, taga Sitio Sacred Heart, Cogon Pardo Siyudad sa Sugbo.

Sila si Insp. Ronaldo Logroño ug mga sakop sa Regional Mobile Force Battalion ang nakadakop sa duha human nga nakuhaan sila og upat ka paketeng gidudahang shabu. (BANAT NEWS)