Batan-on nalutsan og search warrant

CEBU, Philippines — Nasakmit sa kapolisan ang 22 ka gagmay nga pakete sa shabu gikan sa 21-anyos nga lalaki nga nadakpan pinaagi sa search warrant alas 8 pasado sa niaging gabii sa Saac 1, Buaya, Dakbayan sa Lapu-Lapu.

Si Senior Inspector Alden Zambrano sa City Drug Enforcement Unit (CDEU) sa Lapu-Lapu City Police Office (LLCPO) maoy nangulo sa pagdakop sa suspek nga si Jose Igot, nagpuyo sa maong lugar.

Lakip sa nakuha nga ebidensiya ang plastic container nga gisudlan sa 22 ka gagmay nga pakete sa shabu nga nagkantidad og P12,980.

Dugang nasakmit ang P300 nga gituohang halin sa ilegal nga pagpamaligya og shabu.

Laing nadakpan ang gikatahapang pusher sa Sitio Sto. Niño, Lamac, Lungsod sa Consolacion alas 2 pasado sa niaging kaadlawon.

Si PO2 Retchie Guilleran sa Consolacion Police Station niila sa dinakpan nga si Gerome Weter, 31, nga nagpuyo sa maong dapit.

Nasakmit gikan sa dinakpan ang duha ka gagmay nga pakete sa shabu ug P200 nga buy-bust money.

Nadakpan sab sa Liloan Police Station ang usa ka tawo nga nag-atubang og kaso sa kalapasan sa Anti-Violence Against Women and Children.

Si Superintendent Randy Korret, hepe sa Liloan Police Station niila sa suspek nga si Rolando Villaflor Jr., 39, taga Lorega, Dakbayan sa Sugbo.

Si Villaflor nadakpan sa panimalay nga gipuy-an sa Garden Bloom Villas, Barangay Cotcot, Lungsod sa Liloan alas 8 pasado sa niaging gabii. (BANAT NEWS)