Basketball coach gipatay
CEBU, Philippines — Patay ang usa ka 36-anyos nga basketball coach samtang padulong kining mopauli sa ilang balay sa may Gabriel Elorde Street, Sitio Avocado, Barangay Mambaling Cebu City.
Ang nakalas mao si Jeffcloyd Cui, nagpuyo sa Avocado Street sa maong barangay. Samtang duha ka wala mailhing lalaki ang giingong nagpatay sa biktima.
Matud pa ni Senior Police Officer 1 Ronald Ybanez, Desk Officer sa Mambaling Police Station gikan nitambong og birthday party si Cui ug sa pag-uli niini gisundan kini sa duha ka mga lalaki ug walay daghan estorya gipusil kini sa makadaghan higayon nga maoy naingnan sa hinanali niini nga kamatayon.
Dali nga nakasibat ang mga mamumuno biniyaan ang biktima nga naglunang sa kaugalingon nga dugo.
Blangko pa karon ang kapulisan sa motibo sa pagpusil patay kang Cui apan wala nila gisalikway ang personal nga bangi.
Walo ka basiyo sa bala sa kalibre 45, upat ka deformed slugs ang nakuha diha sa crime scene. Padayon pa ang gihimo nga imbestigasyon karon sa kapulisan aron mailhan ang mga mamumuno. (BANAT NEWS)
- Latest