Archbishop Palma way hulga

CEBU, Philippines — Wala nagkinahanglan og security escort si Cebu Archbishop Jose Palma tungod kay wala siyay hulga sa kinabuhi human napatay sa kapolisan ang armado nga nangita kaniya sa Archbishop Palace sa niaging adlaw.

Hinoon pabor si Palma nga butangan og polis ang Archbishop Palace base sa pagsusi sa kapolisan sa sitwasyon.

Ang direktor sa Police Regional Office-7, Chief Supt. Debold Sinas, namahayag nga bisan walay nadawat nga hulga ang Arsobiso, hatagan gihapon kini nila og seguridad ilabi na sa palasyo diin nasuta nga luag ra kaayo ang seguridad.

Nagbutang na ang hepe sa Cebu City Police Station 2, Chief Supt. Maria Theresa Macatangay og uniformed personnel sa gawas sa palasyo ug mga nagsibilyang polis sa sulod niini. Matud ni Sinas nga iya pang estoryahon si Palma kabahin sa planong closed-in security niini.

Gipatin-aw sa heneral nga isolated case ang nahitabo kang Jeffrey Cañedo ug wala kini nagpakita nga hulga sa tibuok Simbahang Katoliko.

"Gulo-gulo iyang isip, tapos nag-resist ng arrest syempre ang polis nakita man pud sa SOCO nga naay strength (gikan kang Cañedo)," si Sinas niingon. Nakuha sa crime scene ang upat ka kabhang sa kalibre .38 gikan sa paltik nga armas ni Cañedo samtang 20 ka kabhang gikan sa polis ug nagpakita lang nga nibawos kini sa pagpabuto.

Problemado si Cañedo human giingong wala na siya tinggi sa iyang asawa sukad sa ilang panagbuwag.

Samtang gibati usab ni Palma ang kasubo sa kamatayon ni Cañedo.

Gitug-an sa Arsobispo nga nagkahinabi na sila sa amahan sa namatay ug gani nagpasalamat kini kaniya.

Ang Arsobispo andam mohatag og ayuda kutob sa ilang mahimo ug tinguha usab niya nga mobisita sa haya ni Cañedo. (GMR) (BANAT NEWS)