Gikang naligo, gidunggab sa gang ug namatay

CEBU, Philippines — Namatay ang 18-anyos nga ulitawo dihang gidunggab sa usa ka sakop sa gang sa kabataan, samtang ang biktima gikan nga naligo sa uwan, didto sa Sitio Viking, Barangay Mambaling, Dakbayan sa Sugbo kagahapon sa kaadlawon.

Ang biktima nga si Niño Catubig, taga Sitio Sipphie Ibabao, Barangay Mambaling, may kaubang barkada diha nga nasugatan nila ang grupo sa mga batan-on.

Sa imbestigasyon ni SPO1 Geoffrey Gutual samtang naglakaw sila si Catubig, gikasugat nila ang grupo sa mga babaye ug lalaki. Ang usa sa ilang gikasugat, nangutana kon sila ba maoy nangulata kaniadto sa ilang “brad.”

Bisan sa pagbalibad nila ni Catubig, gipangsumbag sila sa mga lalaki nga gikasugat nila. Nanagan sila si Catubig ug ang iyang barkada, apan gigukod sila sa mga lalaki.

Matud pa nga pag-abot nila ni Catubig dapit sa flyover, naabtan si Catubig sa mga migukod kaniya ug gidunggab siya ug gibiyaan nga nakaangkon og duha ka samad sa dughan.

Ang samaron nga si Catubig gidala unta sa ospital apan wala na gyud maluwas tungod sa kagrabe sa iyang mga samad.

“Gipareglahan ra ni. Naa-an lang ba,” pangagpas ni Gutual.

Matud sa mga imbestigador sa homicide section nga mosuway sila pagsusi kon may CCTV camera ba sa maong lugar sa pamasin nga makatabang pag-ila sa mga mipatay ni Catubig. (BANAT NEWS)