Dunggan sa tiguwang natabas sa tigbas

CEBU, Philippines — Napikas ang tuo nga dunggan sa usa ka 75-anyos nga tigulang lalaki dihang gitigbas siya sa iyang silingan didto sa Barangay Nangka, lungsod sa Consolacion kaniadtong Martes sa udto.

Si SPO2 Vicente Diola sa Consolacion Police Station miila sa biktima nga si Agustin Dumaguit, minyo ug taga Barangay Nangka, samtang ang mitigbas kaniya mao si Gerome Palang, 45. Gipanghabas sa tiguwang ang labong nga mga sagbot sa bakanteng luna duol sa ilang panimalay, dihang kalit lang miabot ang suspetsado nga masuk-anon ug sila nagkalalis.

Matud ni SPO2 Diola nga si Palang wala makaantos sa ilang panaglalis ug gitigbas niya ang tiguwang tumong gyud unta sa ulo, apan nakalihay ang biktima, hinungdan nga ang dunggan ra ang naigo.

Ang tiguwang nga nagbitbit usab og sundang buot unta nga mobawos ngadto ni Palang, apan ang suspetsado abtik kaayong misutoy pagdagan. (/RUB)(BANATNEWS)