Daghan pang mi-counterflow
CEBU, Philippines — Nadugangan ang gidaghanon sa mga sakyanan nga nasakpan ug gitanggong dinhi sa Dakbayan sa Sugbo niining semanaha tungod kay ang drayber niini mi-drive sugat sa bul-og sa trapiko, nga gitawag og “counterflow.”
Gani, usa ka armored van sa bangko ang naapil sa gidakop human nga nasakpan kini nga mi-counterflow didto sa Barangay Labangon.
Ang report nga miabot sa opisina ni Mayor Tomas Osmeña gikan ni Isko Ouano, ang operations chief sa CITOM, nagkanayon nga 178 ka motorsiklo, duha ka taxi ug duha ka PUJ ang nasakpan hangtud sa miaging Martes.
Apan sa pakisusi nga gihimo sa DYLA gikan sa CITOM, nadugangan pa gyud ang maong gidaghanon kay gikan niadtong Martes daghan pa gihapong sakyanan nga nasakpan sa pag-counterflow.
Duha sa mga nadakpan, tanggongon na og duha ka buwan kay base sa rekord, kaduha na kini madakpi. Mando ni Mayor Osmeña nga kon ang sakyanan masakpan sa ikaduha nga higayon, duha na ka buwan ang pagtanggong niini. (RUB)(BANATNEWS)
- Latest