Kanhi piniriso sikop sa shabu

CEBU, Philippines — Nadakpan ang duha ka pusher og shabu sa buy-bust operation sa kapolisan ug usa niini kanhi binilanggo sa Cebu Provincial and Rehabilitation Center (CPDRC) ug nitahan na sa Oplan Tukhang sa niaging buwan.

Si Police Superintendent Randy Korret, hepe sa Liloan Police Station, niingon nga ang pagdakop natigayon alas 10 pasado sa niaging gabii sa Sitio Simborio, Tayud sa maong lungsod.

Giila ni Korret ang mga dinakpan nga naglakip kang Raymond Garbo Gomez, 29, kanhi binilanggo sa CPDRC, ug niadto lang Enero 8 niining tuiga nakagawas sa kaso nga pagpayuhot og ilegal nga drugas.

Dugang nadakpan sa mao gihapong lugar mao si Eliszer Cuyos Pepito alyas Shaolen, 21-anyos.

Matud ni Korret nga nakadawat na sila og mga taho gikan sa mga nagpakabanang molupyo nga nagpadayon sa ilang ilegal nga kalihukan ang suspek.

Nasakmit sa kapolisan ang 36 gramos nga shabu nga kantidad og P248,000.

Sa laing bahin, balor og P17 mil ang drugas nga nasakmit sa sunod-sunod nga buy-bust operation sa tulo ka barangay sa Dakbayan sa Danao niadtong Domingo.

Ang mga suspek nga nasikop sa Barangay Poblacion mao sila si Jonathan Tizon, residente sa maong lugar; Alex Euas, 44, trisikad driver nga taga Pasil, Carmen, ug 17-anyos nga construction worker nga taga Tupas St., Suba sa maong dakbayan.

Samtang usa ka Bernardo Capuno, 33, ang nakuhaan og pito ka gagmay’ng pakete sa shabu ug P300 nga kwarta sa may Duterte St., Suba sa nahisgutang siyudad ala 1:40 sa hapon.

Sa Juan Luna St., Barangay Looc sa maong siyudad, siyam ka gagmay’ng pakete ug P350 nga kwarta ang nasakmit gikan nila ni Jovelyn Barigas, 22, ug Wendell Roble, 32, construction worker, taga Manlayag-patag, Danao City alas 2:51 sa hapon. - Lara Rose P. Lasmarias (BANAT NEWS)