First Sangat niladlad sab sa ilang dokumento
CEBU, Philippines – Hugot nga giangkon sa First Sangat SF International Port Corporation nga sila ang may katungod sa pag-ugmad sa P12.5 bilyones nga pantalan ug reclamation project sa Barangay Sangat, San Fernando.
Giladlad ni Ruben Feliciano, presidente sa First Sangat, atubangan sa mga sakop sa media ang mga dokumento nga nagtugot sa kompaniya nga mougmad sa proyekto.
Kini human si San Fernando Mayor Lakambini “Neneth” Reluya nikwestiyon sa legalidad sa kompanya ni Feliciano.
Niadtong Lunes gipahunong ni Reluya pinaagi sa pagluwat og cease and desist order ang gisugdan nga pagtambak og anapog alang sa proyekto.
Ang lakang ni Reluya gihimo pipila ka adlaw human siya gikiha ni Feliciano ug ni Atty. Felizardo Tiu sa buhatan sa Ombudsman nunot sa iya nahaunang executive order sa pagsuspenso sa bisan unsang kaugmaran sa baybayon sa Sangat.
Si Reluya nipasangil nga gilingla ni Feliciano ang lokal nga kagamhanan nunot sa paggamit niini og duha ka pangan sa kompanya diin siya ang presidente.
Matud ni Reluya nga ang gihatagan og pagtugot sa lokal nga kagamhanan nga maka-ugmad sa proyekto mao ang Sangat Bay Development Corporation ug gani nagpirmahay na sila og memorandum of agreement (MOA) tali ni Feliciano.
Usa sa gipasikaran ni Reluya sa pagluwat og executive order mao ang reklamo nga naabot sa Malacañang labot sa maong proyekto gikan sa mga mananagat sa Sangat.
Apan kagahapon gitubag ni Feliciano ang tanang pasangil ni Reluya pinaagi sa pagpakita sa tanang original nga dokumento gikan sa Environmental Management Bureau, Department of Environment and Natural Resources, Cebu Port Authority ug ubang ahensiya nga nagtugot sa maong proyekto. (Cherry Ann F. Fornez/GMR)(BANAT NEWS)
- Latest
