Mantika nisilaob sa kan-anan sa mall
CEBU, Philippines – Naukay ang mga tawo sa usa ka mall sa Basak, Dakbayan sa Lapu-Lapu dihang kalit nisilaob ang kayo sa Mooon Café nga may dala nga itom nga aso alas 6:44 sa niaging gabii.
Si Fire Officer 2 Johnmar Lesiges sa Lapu-Lapu City Fire Department niingon nga ang giluto sa mantika sa kaha nga gibuboan og tubig maoy hinungdan sa kalit nga pagsilaob sa kayo.
Matud ni Lesiges nga kini sagad nga mahitabo kung ang nagbukal nga mantika kalitan sa pagbubo og tubig apan kung dili madali sa pagtabang kuyaw nga hinungdan sa sunog.
Wala hinuon nakadako ang kayo nga nakontrolar human sa pipila ka minutos samtang walay namugna nga danyos ngadto sa kan-anan.
Dugang ni Lesiges nga ang kaitom sa aso nga taudtaud nahanaw sulod sa mall ang nakapaalarma sa mga tawo. (/GMR)(BANAT NEWS)
- Latest
