Loot mihimakak sa mga pasangil

CEBU, Philippines — Giklaro ni Daanbantayan Mayor Vicente Loot nga igo ra siyang nihatag og mga anggulo ngadto sa mga imbestigador sa suway sa pag-ambush kanila apan wala niya pasanginli ang mga polis

"I haven't said anything of that sort.  There are angles that I have confided to the investigating officers for them to explore. I trust their capability and expertise to solve the case," matud pang Loot sa iyang text message sa The Freeman.

Ang tigpamaba sa Police Regional Office-7 nga si Police Supt. Reyman Tolentin miawhag  ni Loot pagduso og affidavit bahin sa giingong pamahayag niini nga may nalambigit nga polis sa pagpangrakrak kanila.

Sa media briefing didto sa kaulohan niadtong Mayo 15, gitug-an ni PNP Chief Oscar Albayalde nga  si Loot miingon nga gidudahan niya nga polis ang usa sa duha ka mga nangrakrak.

"May sinasabi siya na Tagalog speaking, at meron di naman siyang pinaghihinalaan na active police. So, ito lahat ay tinitingnan natin lahat ng information na'yun galing sa kanya," si Albayalde miingon.

Apan si Albayalde miklaro nga dili kadto opisyal nga impormasyon bahin sa kaso.  Masaligon si Loot kang PRO-7 Chief Superintendent Robert Quenery nga matabangan siya nga malimpyo ang iyang pangalan.

Sumala pa niya, gusto niyang ipa-inspeksyon sa mga polis ang iyang balay isip kooperasyon ug dili tungod kay 'guilty' siya sa pasangil.

Sa laing pasangil, si Loot namahayag nga nakadawat na usab og sayop nga impormasyon si Duterte. Kini bahin sa matud pa pagpatay sa duha ka mga polis ug sa usa ka sundalo didto sa Ozamis City tungod sa matud pa wala pagtuman sa mando ni Loot.

"I don't know where the President is getting his info. I was never assigned nor has set foot in Ozamis even during my younger years, much more ordered the killing of two police officers and a military man there which is highly preposterous.  As a police general was assigned only in training service in Camp Crame," sumala pa ni Loot. Gikatahong nasuko ang pangulo dihang gihagit kini ni Loot nga pamatud-an ang mga alegasyon apan iya kining gihimakak.

"That's highly abnormal and ridiculous to a person to say that to a President. He might be referring to someone else," matud pang Loot.

Sa pakigpulong ni Duterte uban sa mga mayor diha sa Waterfront Hotel and Casino sa Cebu City niadtong Sabado gibaharan ni Duterte ang mga mayor nga malambigit sa ilegal nga drugas. Namahayag usab si Duterte nga adunay lawak sa balay ni Loot nga puno og ilegal nga drugas apan kini gihimakak usab sa mayor ug miawhag pa sa kapolisan pagsusi sa ilang balay. (The Freeman/IBM) (BANAT NEWS)