Pagduaw ni Duterte sa Sugbo malinawon

CEBU, Philippines — Sa kinatibuk-an, hapsay ug malinawon ang pagbisita ni Presidente Rodrigo Duterte dinhi sa Sugbo nga gitapos sa iyang pagpamista kagahapon didto sa lungsod sa Tabugon sa habagatang bahin sa Sugbo.

Kini maoy paghulagway ni Police Superintendent Reyman Tolentin, ang tigpamaba sa Police Regional Office (PRO) - 7.

Si Tolentin miingon nga tungod kini sa hugot nga seguridad nga ilang gipakatap sa lugar ug sa mga silingang lungsod.

Dili mominos sa 400 ka polis ang gipakatap sa lungsod sa Tabogon inubanan sa mga sakop sa Armed Forces of the Philippines (AFP) aron sa pagsiguro sa seguridad sa presidente.

“Generally peacefull walay rally nga nahitabo ug wala usab reported untoward incidents. Ang security package nga gihatag, from the route, sa area, venue, everything was iron out well. We see to it nga walay bad elements nga makadisgrasya sa atong presidente,” matud ni Tolentin atol sa pakighinabi sa Banat News.

Si Duterte giimbitar sa mayor sa Tabogon nga si Zigfred Duterte atol sa kapistahan sa lungsod kagahapon.Ang duha manag-ig-agaw.

Gibana-bana nga moabot sa 1, 500 ka tawo uban sa mga opisyales sa lungsod ug ikaupat nga distrito pinangulohan nilang Mayor Duterte ug Kong.Benhur Salimbangon ang misugat sa pagbisita ni Duterte sa Tabogon matod pa ni Tolentin. (BANAT NEWS)