Anti-vandalism ordinance gipadaplin una

CEBU, Philippines — Gipadaplin una sa konseho sa Siyudad sa Sugbo ang giduso nga Anti-Vandalism Ordinance.

Kini nitumaw human ang ubang mga konsehal nipadayag sa nagkalain-laing legal concerns labot sa ordinansahon nga giduso ni Konsehal Joel Garganera.

Si Konsehal Sisinio Andales niasoy nga ang proponent mahimong maka-amendar sa penalty provision sa Ordinance 1361 nga nagdili sa bisan unsa nga matang sa paghugaw-hugaw sa mga istraktura pinaagi sa pagbutang og graffiti.

Sa wala pa giisa ni Andales ang hisgutanan, si Garganera niasoy nga ang tumong sa maong balaudnon mao ang pagpasaka sa multa aron ang vandalism sa siyudad matubag og sakto.

Sigun ni Andales nga ang concern ni Garganera matubag pinaagi sa pag-amendar sa mother ordinance ug pag-awhag sa mga law enforcers nga motabang sa istriktong pagpatuman niini.

Apan si Garganera niingon nga wala masulti sa report sa committee on laws, ordinances and styling nga dunay existing legislation nga magsilot sa vandalism.

Si Konsehal Jose Daluz III nidason kang Garganera diin sigun pa niya nga kinahanglang dunay lahi nga balaudnon sa pagtubag sa vandalism.

Niadtong Enero gipresentar ni Garganera ang proposed ordinance nga magsilot sa mga tawo nga masakpan nga nigamit og aerosol paints sa paghugaw-hugaw sa mga pader ug uban pang istraktura.

Nalatid sa penal provisions nga ang first offense, administrative fine nga P1,000 ang ipahamtang, community service sulod sa lima ka adlaw ug restoration sa property.

Sa second offense multa nga P3,000, community service sulod sa napulo ka adlaw ug restoration sa property ug sa third offense, administrative fine nga P5,000 ug 30 ka adlaw nga pagkapriso depende sa gibug-aton sa kalapasan nga nahimo. (BANAT NEWS)