2 ka ‘hired killers’ nasikop

CEBU, Philippines — Duha ka batan-on nga miangkong mga ‘hired killers’ nadakpan sa kapolisan didto sa Barangay Ermita kagahapon sa buntag, human sila nakapatay og tawo didto sa dalan C. Padilla, sakop sa Barangay San Nicolas, dakbayan sa Sugbo kaniadtong Sabado sa hapon.

Ang ngalan sa mga dinakpan nga nagpangedaron og 18 ug 17-anyos, gipugngan lang usa kay ang kapolisan nagpadayon pa sa pag-imbestigar kabahin sa gitug-an sa mga suspek nga may tawo nga nagsugo kanila nga patyon ang biktima nga si Niño Tañajura.

Si Tañajura nga taga Barangay Basak-Pardo, nagbarug lang didto sa dalan C. Padilla, atubangan sa Gothong Memorial National High School, diha nga gihunongan sa mga suspek nga nagsakay’g motor ug gitabangan pagpusil ang biktima gamit ang kalibre 45 nga pistola.

May nakatug-an ni homicide investigator Winston Ybañez nga ang duha ka suspek maoy mitira ni Tañajura mao nga mihimo dayon sila og hot pursuit operation ug nadakpan ang duha kagahapon.

Ang duha ka suspek didto na madakpi sa kapolisan sa Sitio Bato, sakop sa Barangay Ermita, ug nasakmitan sila og duha ka kalibre 45 nga pistola nga giingong gihatag sa nagsugo kanila nga patyon si Tañajura.

Matud ni Ybañez nga ang duha ka dinakpan gihimoan na og paraffin test aron pagsuta kon sila nakapabuto ba gyud og armas, samtang ang mga pistola nga nasakmit gikan kanila isumiter og ballistics test aron pagsuta kon ang mga bala nga nakaigo ni Tañajura ug mga kapsola nga nakaplagan sa crime scene, gikan ba sa maong armas.

Gisusi usab karon sa kapolisan ang report nga kadto si Tañajura nalambigit sa negosyo sa gidiling drugas, kay ang mga dinakpan mitug-an nga ang rason nga gipapatay ang biktima mao ang giingong kapakyas niya sa pag-remit sa halin sa shabu.

Sa interview sa mga reporters, ang duha ka dinakpan mitug-an nga gibayran na sila sa mastermind og P45 mil human nila mapatay si Tañajura, nga gipanid-an nila sulod sa duha ka adlaw sa wala pa nila patya. (BANAT NEWS)