Motor vs traysikol usa patay
CEBU, Philippines — Usa ka driver sa motorsiklo ang nakutloan sa iyang kinabuhi ug naangol ang angkas niini human nabangga sa traysikol kagahapon sa kaadlawon sa Lower Lipata, Minglanilla.
Ang nakalas mao si Stalin Jade Gesto, taga C. Padilla Street, Barangay Duljo- Fatima sa dakbayan sa Sugbo. Samtang ang naangol mao si Bryan Villacorta.
Matud pa ni Police Officer 3 Nikki Carlo Plarizan, Desk Officer sa Minglanilla Police Station padulong sa Tungkil ang traysikol nga gimaneho ni Jeraldine Ingan apan pag-abot sa lugar nikawat sa linya si Gesto ug nabangga sa traysikol.
Tungod sa gikusgon sa panagbangga ang traysikol nitakilid samtang nalahos sa poste ang motor ug nangahulog silang Gesto.
Gidala sa tambalanan ang mga biktima apan nakutloan gyud sa kinabuhi si Gesto.
Si Ingan kasamtangan nga gitanggong sa kapolisan ug gipaabot ang pagpasang-at og tukma nga kaso. (IBM) (BANAT NEWS)
- Latest