Oratio Imperata tungod sa mga pagpatay

CEBU, Philippines — Ang Archdiocese of Cebu posibleng mopagawas og Oratio Imperata tungod sa sagunson nga pagpamatay dinhi sa Metro Cebu matud pa ni Archbishop Jose Palma nga nahinabi sa Banat News.

Ang arsobispo kinsa bag-ohay lang naabot gikan sa iyang biyahe sa Roma, nasubo sa mga nadawat nga taho may kalabutan sa sunod-sunod nga pagpamusil mugna sa riding-in-tandem. Niini lang buwan sa Marso moabot og unom ka tawo ang gipatay sa Lapu-Lapu City, sagad kanila may kalambigitan sa ilegal nga drugas.

Matud pa sa Arsobispo magtagbo sila sa iyang board of consultors aron tukion kung kinahanglang mopagawas og special nga pag-ampo alang sa paghunong na sa sunod-sunod nga patay dinhi.

Sumala pa ni Palma sa nanglabay nga katuigan pabilin ang baruganan sa simbahan nga bililhon ang kinabuhi ug hatagan og kahigayonan ang mga makasasala nga motubag sa ilang mga nahimo tungod kay aduna pa silay panahon nga magbag-o.

Matud niya ang balaod dili angayan ibutang sa mga kamot sa tawo kung dili ipaagi gyud og proseso.

Ang Commission on Human Rights 7 naalarma na usab sa sunod-sunod nga pagpamusil patay ug ang Chief Investigator nga si Leo Villarino nanghinaut nga wala mobalik ang vigilante-style killings dinhi.

Sa buwan sa Marso duha pa lang ka kaso sa pagpamusil ang ilang gipaubos sa motu-propio investigation. (BANAT NEWS)