1,656 taxi units na-calibrate na
CEBU, Philippines — Aduna nay 1,656 ka taxi units ang na-calibrate sa Land Transportation Franchising and Regulatory Board sa Metro Cebu.
Matud ni LTFRB-7 Director Ahmed Cuizon nga kagahapong adlawa, adunay 71 ka taxi units nga na-calibrate nga adunay plate number nga nagtapos og 3 ug 8 nga nagsugod niadtong Marso 13 hangtud Abril 3.
Ang pag-calibrate sa taxi units nga adunay ending 2 ug 7 nagsugod niadtong Pebrero 19 hangtud Marso 12 diin adunay 1,585 ang na-calibrate. Ang Sugbo adunay kapin 6,000 ka taxi units.
Ubos sa Memorandum Circular 2018-001 o ang Implementing Guidelines for Calibration and Resealing/Testing of 2017 Taxi Fare Adjustment, mao kini ang uban pang schedule sa taxi calibration: plate number ending 4 ug 9 sa Abril 3 hangtud Abril 23; plate number ending 5 ug 0 sa Abril 24 hangtud Mayo 14; plate number ending 1 ug 6 sa Mayo 15 hangtud Hunyo 4.
Matud ni Cuizon nga adunay P200 matag adlaw nga multa sa mga taxi units nga dili ma-calibrate sa ilang gigahin nga schedule.
Dugang pa ni Cuizon nga daghan nang na-calibrate nga taxi units bisan pa man wala pa naabot ang official stickers gikan sa LTFRB Manila.
Ang maong stickers nagpamatuod nga ang usa ka taxi unit na-calibrate na.
Matud ni Cuizon nga ang mga karaang stickers pa ang ilang gigamit samtang karon pang semanaha moabot ang official stickers. (BANAT NEWS)
- Latest
