P1.2B budget sa Toledo aprobado

CEBU, Philippines — Giaprubahan na kagahapon sa konseho sa dakbayan sa Toledo ang P1.2 bilyones nga proposed budget sa dakbayan karong tuiga human nakontroberisya kon diin di momenus usa ka gatos ka mga job order nga empleyado sa Toledo City Hospital ang wala usa gipatrabaho tungod kay wala nay masweldo ang dakbayan.

Dili momenus 900 ka  job order employees sa Toledo City Hall ang walay nadawat  nga suweldo  hangtod karon gikan sa bulan sa Enero human wala usa aprobahi sa konseho sa Toledo ang proposed 2018 budget niini.

Gawas sa 106 ka JOs sa Toledo City Hospital aduna pay kapin 700 ka mga JOs gikan sa nagkadaiyang buhatan sa siyudad nga wa pa usab masweldohi matud pa ni acting Mayor  Antonio Yapha Jr.

Tungod usab sa kakulang sa mga medical personnel sa Toledo City Hospital dili momenus 20 ka personnel ang gi-deploy sa Provincial Health Office (PHO)  aron tabangan sila didto sa maong tambalanan.

Ang maong mga personnel gikan kini health emergency management services (HEMS)  lakip na district hospital sa Balamban, Tuburan ug Pinamungajan.

Gawas niana nihangyo usab si Yapha sa Department of Health nga mopadala og medical personnel ngadto sa ilang tambalanan.

Si Dr. Jaime Bernadas, regional director sa DOH-7 nagkanayon nga maghulat lang sila sa request ni Yapha apan nagpadala na sila og assessment team didto.

Si suspended mayor John Henry Osmeña sa iyang facebook post kagahapon niawhag sa mga JOs nga mo-report ngadto sa buhatan ni konsehal   Merly Abad, Joie Piczon-Perales, Arlene Zambo ug ubang konsehal sa maong dakbayan aron malista ang ilang pangalan ug mobalik sa trabaho pinaagi ni Dra. Arlene Perez isip mga volunteers.

Misaad pa ang nasuspensong mayor nga mangayo og tabang gikan sa mga pribadong sector aron mahatagan og sweldo ang maong mga empleyado.

Apan si Yapha nagkanayon nga walay katungod si Osmeña tungod kay suspendido pa kini karon.

“Suspenso naman unta siya. Wala siyay right para momando,” matud ni Yapha.  Si Osmeña mihulagway nga “political harassment” ang gihimo ni Yapha aron nga i-hostage ang konseho ug aprobahan ang 2018 budget.

Si Yapha nagkanayon nga dili siya ang nang-harass kondili ang konseho ug karon ang naapektahan mao ang mga taga Toledo.

Ang siyudad nigahin og P47 milyones alang sa hospital sulod sa usa ka tuig. - Raymund Abarcas ug Felix Junjun (BANAT NEWS)