Wage increase di mahimo— Tan
Apan si Philip Tan, kasamtangang representante sa management sector sa Regional Tripartite Wage and Productivity Board -7 ug tag-iya sa Well-Made Motors miingon nga lisod kini ipatuman.
Matud pa niya mahimo kining makabangkarota sa mga pribadong negosyo kay dako ra kaayo ang gipangayo nga dugang suholan.
Ang mga trabahante gusto nga himuong P750 ang adlaw nga suhol sa mga trabahante aron makadawat og P16 mil nga binuwang sweldo.
Apan matud ni Tan nga nagbase sa performance sa usa ka trabahador ang iyang sweldo. Kadtong maayo og performance pwedeng patas-an ang sweldo.
Siya miangkon nga sa pagkakaron ang mga negosyanteng sama niya dili na skills ang pre-requisite para makasulod og trabaho. Importante kanila ang kinaiya.
"Ang kanang dagko og sweldo mo self-correct na with the right skills ug mo- develop into a good attitude. Ang kanang sweldo should not be dictated, it should be coming from the employees themselves to create their value," dugang pahayag ni Tan kinsa kanhi presidente sa Mandaue City Chamber of Commerce.
EO ni Duterte
Masaligon ang mga labor leaders sa gisaad ni Presidente Rodrigo Duterte niadtong Lunes nga iyang solusyonan kining endo.
"Nagbantay mi kay basin promises ra. Tan-awon kun buhaton ba ang gisaad. Tan-awon pud kun unsay unod sa Executive Order. Basin parehas ra sa Department Order 174. Mao na ang context sa amo vigilance," esplikar pa ni Dennis Derige, ang tigpaba sa Partido ng Manggagawa-Cebu.
Matud pa ni Derige si Duterte nakigmiting sa mga labor union leaders (NAGKAISA Labor Coalition, KMU ug uban pa) didto sa Davao City ug nisaad kini ratipikahan ang International Labor Organization Convention 151; i-deputize ang mga trade unions isip the labor laws compliance officer ug ang budget allocation alang sa mga trade union representatives sabutan pa kini.
Laing gisaad ni Duterte nga iyang tan-awon ug tun-an og maayo ang isyu bahin sa contractualization ubos sa Labor Code of the Philippines aron iyang basehan sa pagpaggawas og desisyon.
Himuon niyang priority bill ang House Bill 556 ug HB4444 kabahin sa pagdili na sa tanang klase sa contractualization schemes ug promosyon sa regular employment ug i-review ang wage settings kay si Duterte wala makauyon niini.
“We must ensure these agenda to be realized and implemented by the President," dugang pa ni Derige.
Si Department of Labor and Employment 7 Director Elias Cayanong miingon nga dinhi sa rehiyon, 40 na ka mga kaso ang gipaubos sa mandatory conference diin nakigdayalogo sila kauban ang mga worker groups.
Matud pa niya aduna gayu’y legal contractualization apan gikinahanglan lang nga i-regulate aron mapanalipdan ang katungod sa mga mamumuo.
Hired on the spot
Sa laing bahin, 98 ka mga aplikante nga nisalmot sa local jobs fair sa Kapitolyo niadtong adlaw sa mamumuo ang na hire-on-the-spot sa pipila mga kompaniya.
Sumala ni Matthea Baguia ang consultant sa Cebu Provincial Employment Service Office (PESO) nga kasagaran sa mga na-hire motrabaho sa mga department stores, marketing o anaa sa services.
Kapin usa ka libo ang mitambong sa local jobs fair sa Kapitolyo diin adunay hiring sa 33 ka kompaniya, apan bisan kagahapon nagpadayon ang pagdagsa sa mga aplikante aron sa gihapon nga mo-apply, kini human nga ang Industrial Personnel and Management Services, Inc. (IPAMS) nagbukas og trabaho alang sa abroad.
Pipila lang ang bukas nga trabaho mao ang food beverage personnel sa Bahrain, Kuwait, Qatar ug Saudi Arabia; airport ground support sa Qatar, canning ug food processing sa Dubai; can factory assembler, food processing plan for mechanical technician ug nurse sa UK, ug California,USA.
Di moubos usa ka gatos ang mi-apply didto sa PESO kagahapon ug gipaabot nga mobalik pa ang uban karong adlawa. Mitchelle Palaubsanon, Rowena Capistrano, Le Phyllis F. Antojado ug report ni Pamela Faith Pogoy (BANAT NEWS)
- Latest
