Mga kooperatiba supak sa HB 4774

CEBU, Philippines – Mipadayag og dakong pagsupak ang dul-an dos mil ka mga miyembro sa mga nagkalain-laing mga kooperatiba dinhi sa Siyudad sa Sugbo sa gitinguhang pag-repeal sa Kongreso sa mga tax exemptions sa mga kooperatiba sa tibuok nasud.

Niadtong adlaw nga Sabado, gipahigayon diha sa Fuente Osmeña Circle ang protesta sa mga kooperatiba nga supak sa House Bill 4774 kon Tax Reform for Acceleration ug Inclusion Bill.

Matud pa ang unod sa HB 4774 nagtinguha nga tangtangon ang 87 ka tax exemptions  nga naglakip sa mga kooperatiba, low cost housing, lease of residential units, power transmission, domestic shipping, senior citizens ug uban pa.

Moabot 60 ka mga kooperatiba ang niduyog sa kalihokan sa ubang kooperatiba sa nagkalain-laing mga dapit sa nasud.

Si Mayor Tomas Osmeña mipadala kang executive assistant Bimbo Fernandez aron ipaabot ang iyang suporta sa mga kooperatiba.

Matud pa sa mensahe sa mayor mga pobre nga tawo sa nasud ang mga miyembro sa mga kooperatiba ug dili angay pabuhisan. -/EIM (BANAT NEWS)