PRO-7: Maximum tolerance

CEBU, Philippines – Molusad og mga rallies ang mga labor groups karong adlawa atol sa 130 ka tuig nga Labor Day, samtang ang kapolisan nangandam na sa seguridad sa maong kalihokan.

Ang grupo sa Bayan, Kilusang Mayo Uno, Anakbayan-Central Visayas  ug ang Pinagkaisang Samahan ng mga Tsuper at Operators Nationwide-Cebu, Kilusang Magbubukid ng Pilipinas ug ang Panaghugpong Kadamay magmartsa gikan sa Fuente Osmeña Rotunda padulong sa dalan Colon St. diin mopahigayon sila og multi-sectoral nga programa.

Alas 7:00 pa lang sa buntag ang PISTON mag-una nang daan sa Colon St.  aron ilang ipadayag ang ilang pagsupak sa pag phase-out sa mga jeepney nga lapas na og 15 ka tuig.

Samtang ang Nagkaisa nga gilangkuban sa Associated Labor Unions-Trade Union Congress of the Philippines, Partido ng Manggagawa-Cebu, Alliance of Progressive Labor, Bukluran ng Manggagawang Pilipino, Kilusan-Makabayan, Alliance of Genuine Labor Organization ug PS-Link ug Sentro ng mga Nagkakaisa at Progresibong Manggagawa mag rally gikan sa P. del Rosario St. padung sa Colon St..

Apan si Jun Tagalog, tigpamaba sa ALU-TUCP miingon nga sa dili pa mokuyog sa rally sa Colon magtapok una sila sa Department of Labor and Employment-7 dayon momartsa padung sa Pier 1.

Ang DOLE-7 mopahigayon og caravan gikan sa Lapu-Lapu City-Mandaue City-Cebu City-Talisay City alang sa paglusad og mga kalihokan apil na niini ang mga jobs fair.

Si Chief Supt. Noli Taliño, director sa Police Regional Office-Central  miingon nga aduna na silay giandam nga mobantay sa mga kalihokan.

“Monitor the rally and observe maximum tolerance,” matud pang Chief Supt. Noli Taliño, director sa Police Regional Office.

Samtang si  Sr. Supt. Joel Doria, director sa Cebu City Police Office (CCPO) miingon nga adunay mga checkpoints nga ibutang pasud ug pagawas sa siyudad.

Andam na usab ang Civil Disturbance Management Platoon o CDM aron makaresponde kun gikinahanglan.

Samtang sa Mandaue City, ang kapolisan mopahugot usab sa ilang pagbantay sa mga vital installations sa siyudad. -/EIM (BANAT NEWS)