Lalaki patay sa kulata

CEBU, Philippines - Patay ang usa ka lalaki  human kini gikulata sa iyang silingan sa Saac 1, Brgy. Buaya, Dakbayan sa Lapu-Lapu.

Si Police Officer 3 Joseph Cutanda sa Homicide Section sa LLCPO miila sa biktima nga mao si Cesar Vistal Estoquia, 30, ug  ang suspetsado mao si Kiven Cosep, 21, silingan niini sa maong dapit.

Matud pa ni Cutanda nga nakig-inom ang biktima sa iyang mga higala sa usa ka tindahan sa maong dapit ug  ang suspetsado nga kalit lang mitumaw ug gisukmag ang biktima. Maayong pagkaigo sa apapangig sa biktima ug natumba kini ubos ug  tungod usab sa kahubog  wala na dayon makabangon kay nakuyapan.

Apan bisan nagbuy-od na kini sa yuta wala kini lung-i pagsukmag ug giyatakyatakan ang ulo niini sa suspetsado.

Ang mga kainom ug kabanay sa biktima ang midala kaniya sa Lapu-Lapu City District Hospital apan gideklarar kini sa mga doktor nga dead on arrival.

Nadakpan hinuon ang  suspetsado sa pagtubag sa maong alarma apan wala pa masayri kun unsay motibo niini pagpatay sa biktima. - /EIM) (BANAT NEWS)