Osmeña gi-update sa CCLEX

CEBU, Philippines - Mibisita kang Mayor Tomas Osmeña ang core group sa Cebu-Cordova Link Expressway (CCLEX) aron pahibaw-on kini sa umaabot nga groundbreaking ceremony sa Cebu-Cordova Bridge Project karong Marso 2, adlaw’ng Huwebes nga tambungan ni Presidente Rodrigo Duterte.

 Gipangulohan ang maong grupo ni Arlette Capistrano kinsa miingon nga ang tumong sa ilang pagbisita sa mayor mao ang pag-update niini kalabot sa umaabot nga kalihukan sa nahisgutang proyekto.

Ilang gituki ang program flow diin ang proponent sa Lungsod sa Cordova ug Siyudad sa Sugbo parehong mohatag og speech ug sa habig sa pribadong sektor nga mohatag sa mensahe mao si Manny V. Pangilinan.

 Dugang ni Capistrano nga gi-update sab nila si Mayor Osmeña nga mohimo og aerial survey sa Cordova ug South Road Properties si Presidente Duterte sa dili pa ang kalihukan.

Bahin sa mga permit alang sa maong proyekto, matud ni Engr. Ramon Rañises sa CCLEX nga sa buwan sa Mayo makuha na nila ang tanang rekisitos nga gikinahanglan aron nga masugdan nila sa buwan sa Hulyo ang konstraksiyon sa 3rd bridge.

 Malaumon ang grupo nga masugdan dayon ang katukuran sa 8.25 kilometers nga taytayan pinaagi sa tabang sa duha ka LGU kay tinguha nilang mahuman kini sa dili pa matapos ang termino ni Duterte. (BANAT NEWS)