Talisay malaumon makasalmot sa grand parade

CEBU, Philippines - Masaligon ang kampo sa Dakbayan sa Talisay nga mosalmot sa Sinulog sa Kabataan karong Domingo nga makakuha gihapon sila og luna sa kadaugan sa ilang pagbalik sa pagsalmot sa kalihukan karong tuiga.

Tungod niini, si Dr. Leah Noveras, city schools division superintendent, nihangyo nang daan kang Mayor Eduardo Gullas nga mogahin og budget alang sa Enero 15 nga mao ang Sinulog Grand Parade.

Sa pagsalmot lang sa Sinulog sa Kabataan nigahin og P5.6 milyones ang siyudad nga mao karon ang ilang gigamit sa mga partisipante.

Hinuon gipangayuan pa sila og proposal sa mayor aron kung makaapil gyud sila sa grand parade dili na sila maglisud sa pagpangita og pundo nga ilang magamit.

Wala hinoon nibalibad ang mayor sa hangyo.

Si Noveras nibutyag nga daku niya nga kalipay dihang iyang nakita ang kabataan nga nagsul-ob na sa ilang mga sapot ug nisayaw atubangan kaniya.

Siya nagtuo nga makakuha gyud sila og luna alang sa kadaugan.

Apan lahi ang iyang giestorya sa kabataan nga mosalmot sa pasundayag tungod kay sila mosayaw alang sa pagpasalamat sa Balaang Bata nga si Senyor Santo Niño sa pagpakita sa ilang talento ingon man pag-umol sa ilang pagtuo sa Labaw nga Makagagahum.

Siya nagkanayon nga ang pagkuha sa ganti mao na lang ang segunda nga ilang gihunahuna apan mas maayo gyud nga modaug.

Moabot sa 750 kabuok ang contingent sa Talisay wala pay labot sa mga magtutudlo nga mag-atiman sa mga tinun-an aron sila luwas ug dili magutman sa matag adlaw nila nga praktis. (BANAT NEWS)