Hugot nga seguridad gihangop sa Dalaguete

CEBU, Philippines - Gihangop sa mga molupyo sa Lungsod sa Dalaguete ang presensiya sa kapolisan ug militar tungod kay mas napahugtan pa gyud ang seguridad sa ilang lugar.

Kini ang gipadayag ni Bokal Jose Mari “Tata” Salvador human gikataho nga adunay mga sakop sa teroristang grupo nga mangidnap sa maong lugar.

Matud ni Salvador nga sa wala pa mogawas ang travel advisory sa US Embassy, hugot na daan ang seguridad sa ilang lungsod tungod sa kampanya batok sa ilegal nga drugas.

“Mas nadugangan pa hinoon karon,” matud ni Salvador.  Ang mga sakop sa Regional Public Safety Battalion-7 ang gipakatap aron paghatag og seguridad sa lungsod.

Lakip sa gipakatap sa lungsod ang mga sakop sa Scout Rangers gikan sa 301st Infantry Brigade sa Philippine Army nga magsilbing Quick Response Team sa lugar.

Nobiyembre 3 dihang niluwat ang US Embassy og pahimangno sa mga Amerikano sa paglikay sa pagbiyahe sa habagatang bahin sa Probinsiya sa Sugbo ilabi na sa Lungsod sa Dalaguete, Oslob ug Sumilon Island gumikan sa giingong mga sakop sa Abu Sayyaf ang mohimo og kidnapping operations.

Bisan giklaro sa kapolisan nga luwas ang Sugbo ug ang tibuok Central Visayas, gipahimangnoan gihapon ang publiko nga magmabinantayon. (BANAT NEWS)