Kapolisan suportado ni Gullas
CEBU, Philippines – Nipasalig sa iyang tanang suporta si Talisay City Mayor Eduardo Gullas ngadto sa bag-ong hepe sa kapolisan sa dakbayan nga si Supt. Emerson Dante.
Si Dante uban sa director sa Cebu Provincial Police Office, Senior Supt. Eric Noble, ang nibisita sa buhatan ni Gullas aron sa pag-courtesy call kagahapon.
Matud ni Noble nga nalipay siya sa gipamahayag sa mayor sa suporta sa tanang kalihukan sa kapolisan ilabi na sa pinansyal.
Siya niingon nga nipasalig sab ang mayor nga dili siya manghilabot sa mga operasyon sa kapolisan gumikan kay ila man kining mandato sa paghatag og kahapsay ug kalinaw sa lugar nga ilang gialagaran.
Nagkanayon si Noble nga gimando hinoon sa mayor ang paghingusog pa gyud sa kampanya batok sa ilegal nga drugas.
Asoy pa niya nga siya nalipay niini tungod kay mao man gyud ang ilang target nga madakpan ang mga tawo nga nagpabilin nga nagnegosyo og ilegal nga drugas.
Dugang ni Noble nga daghan siya’g nakat-onan kang Gullas sa dihang nagka-estorya sila ug iyang nailhan ang mayor pinaagi sa pagbasa sa mga balita sa panahon nga kongresista pa kini ug nahimong gobernador sa Lalawigan sa Sugbo.
Iyang gimanduan si Dante nga mopakita gyud sa iyang labok ug puntariyahon ang Barangay Tanke diin naghitak ang drugas. - /GMR) (BANAT NEWS)
- Latest
