Lolo nga nagbisekleta nadam-agan og motor

CEBU, Philippines - Usa ka 70-anyos nga lolo namatay human siya madam-agi og motorsiklo samtang ang tiguwang nagsakay og bisekleta didto sa national highway sa Barangay Pungtod, Oslob kaniadtong Martes sa hapon.

Wala na makaabot pa sa tambalanan dinhi sa dakbayan sa Sugbo si Domeciano Maghanoy, minyo ug taga Barangay Pungtod. Ang drayber sa motorsiklo nga nakadam-ag sa biktima mao si Arman Layson, 25, minyo nga taga Barangay Tribunal, dakbayan sa Mandaue.

Matud pa ni PO1 Ramon Catubig, sakop sa Oslob Police Station, nga gikan sa Barangay Bato, Samboan si Layson human kini mibisita sa iyang higala.

Sa iyang pagpauli paingon dinhi sa siyudad ug pag-abot sa maong dapit, kalit lang mitabok sa karsada ang tiguwang sakay sa iyang bisekleta hinungdan nga kini nadam-agan sa motorsiklo.

Si Layson nga nahinabi ni PO1 Catubig nangangkon nga dili ra kusog ang iyang dagan atol sa hitabo, apan nagtuo si Catubig nga kusog gyud ang dagan sa motorsiklo mao nga wala na mapugngi ug nadam-agan gyud ang nagbisekleta nga tiguwang.

Ang tiguwang dali dayon nga gidala sa Oslob District Hospital apan tungod sa kagrabe sa iyang kahimtang gibalhin kini sa tambalanan dinhi sa dakbayan sa Sugbo, apan diha pa lang sa ambulansya nakabsan na gayud sa kinabuhi pag-abot nila sa Carcar. Si PO1 Catubig mitug-an nga sa pagkakaron dunay panagsabot-sabot tali sa pamilya sa biktima ug sa drayber sa motorsiklo aron dili lang ipasaka ang kaso sa hukmanan.

Karong adlawa gipaabot sa mga polis ang hukom gyud sa pamilya sa tiguwang kun mopasaka ba sila og kaso batok ni Layson.