Daghan niduaw sa lubong ni Jaguar

CEBU, Philippines - Gidagsa sa ubay-ubay nga mga tawo ang lubnganan ni Jeffrey " Jagaur" Diaz, ang giilang drug lord sa Central Visayas, kinsa napatay sa operasyon sa kapolisan sa Parañaque City.

Matud sa grupo sa mga batan-on nga nag-edad og 10 ngadto sa 12-anyos kinsa giingong mga silingan ni Diaz nga nasubo sila sa gidangatan niini tungod kay kanunay kining manghatag kanila og kalingawan ilabi na kung piyesta sa ilang lugar.

Sumala pa sa maong grupo nga wala nay magpailog kanila og mga sinsilyo panahon sa Pasko.

Samtang usa ka Jeffrey Astillo niila ni Diaz isip suod nga higala ug matinabangon nga tawo nga walay pili ilabi na ngadto sa mga nanginahanglan.

Gitug-an ni Astillo nga ang iyang maguwang maoy suod nga higala ni Diaz apan dihang namatay kini giisip usab siya ni Jaguar nga higala sama nga igsuon.

Gibutyag ni Astillo nga usa sa daku kaayong tabang nga iyang nadawat ni Diaz dihang nanganak ang iyang anak ug na caesarian kini apan wala lang nanghinan-aw si Diaz kaniya ug nihatag gyud kini og tabang.

Si Astillo nag-ampo nga mapasaylo si Diaz sa iyang mga sala nga nahimo ug mapasaylo usab kini sa mga tawo tungod kay wala may tawo nga perpekto kay ang tanan aduna man gyu’y mga kasal-anan.

Naabtan sa Banat News ang ubay-ubay nga mga tawo nga nihalad og mga buwak, nagdagkot og kandila ug lakip ang paghalad sa ilang mga pag-ampo sa giila nilang manggiluy-on ug manggihatagon nga tawo bisan diha lang sila sa gawas sa mausoleum tungod kay sirado man ang maong pantyon.