Poultry di paablihan kun dili makatuman sa rekisitos

CEBU, Philippines - Ang poultry sa lungsod sa Asturias nga maoy hinungdan sa pagdagsa sa mga langaw dili una paablihan hangtud nga makatuman sa mga rekisitos ang tag-iya niini aron dili na modagsa ang mga langaw.

Nasayran nga ang Provincial Health Office (PHO) gipangayoan og report ni Gobernador Hilario Davide, III kabahin sa maong problema.

Ang hepe sa PHO nga si Dr. Rene Catan mibutyag nga sa milabay’ng semana gipasirado ni Mayor Antonio Pintor ang maong poultry.

Matud ni Catan nga nibutyag kaniya si Mayor Pintor nga ang mga poultry sa ilang lugar natukod dihang dili pa siya maoy mayor sa lungsod.

Niadtong Huwebes ang PHO nagpahigayon og meeting tali sa lokal nga kagamhanan sa Asturias ug sa tag-iya sa poultry, mga residente nga mireklamo, representante sa probinsiya ug Manila Pest Control (MAPECON) Company.

Apan niadtong higayona ang abogado lang sa tag-iya sa poultry ang nitungha kay wala kini makaabot sa iyang flight paingon sa Sugbo.

Ang MAPECON nihatag og mga ideya aron makontrolar ang mga langaw pinaagi sa pagbutang og mga devices ug kun unsaon usab sa paghipos sa mga iti sa manok.

Giingong ang mga pamaagi nga gitudlo sa MAPECON maoy gihimo karon sa ubang mga poultry sa maong lungsod.

Gibutyag ni Catan nga ang kagamhanan sa lungsod maoy nihingusog nga motuman ang tagdumala sa poultry sa tanang rekisitos aron kini mabuksan pagbalik.

Ang Municipal Environmental and Natural Resources Office sa Asturias maoy nag-monitor karon sa maong poultry.

Kahinumduman nga ang mga residente sa lugar nangreklamo sa pagdagsa sa langaw tungod sa maong poultry ug gani naggamit na sila og mga moskitero aron dili makasulod ang mga langaw sa ilang balay.

Ang mga residente sa lugar nabalaka usab kabahin sa ilang panglawas tungod sa kadaghan sa langaw.

Gibutyag ni Catan nga adunay mga lapso nga nakita sa pagdumala sa poultry diin usa na niini mao nga walay klaro nga labayan sa mga iti sa manok.

Ang mga mag-uuma sa lugar mangayo og iti ug basa pa ang mahatag sa taga poultry ug ibutang lang nila kini sa usa ka lugar ug dili dayon makuha sa mga mag-uuma hinungdan nga hugopan sa mga langaw.