Upat tipi sa drugas

CEBU, Philippines - Upat ka mga suspetsado nga nalambigit sa ilegal nga drugas ang napatay, duha nakalas human nisukol sa mga polis atol sa managlahing pagpangronda nga gihimo sa probinsya sa Sugbo niadtong nakalabay nga gabii ug kagahapon.

Sa lungsod sa Oslob, nakabsan sa kinabuhi ang usa ka Louie Marindoque human gikatahong misukol sa mga polis nga naghimo sa buy-bust operation diha sa Brgy. Gawi sa nakalabay nga gabii.

Ang maong operasyon gipangulohan ni Police Insp. Deni Mari Pedrozo ug mga sakop sa Municipal Anti-Illegal Drugs Special Operations Task Group nga nipalit kaniya og shabu nga balor P500.

Apan sa dihang paingon na unta nga dakpon ang suspetsado kini misutoy og dagan ug didto padung sa blocking team, dihang giiwagan og flashlight gikatahong mibunot hinuon kini og armas hinungdan nga kini napusilan sa mga polis. Narekober sa mga polis ang usa ka .357 revolver ug ang buy-bust money.

Moalboal

Samtang sa lungsod sa Moalboal, patay sab ang usa ka Michael Cardente dihang giingong nisukol sa mga polis nga naghatud og warrant of arrest sa kaso sa drugas ug paghupot og ilegal nga armas diha sa Brgy. Tomonoy kagahapon sa buntag.

Si Police Officer 3 Ramon Chinel, desk officer sa Moalboal Police miingon misukol ang suspetsado gamit ang kalibre 45 nga pistola apan siya ang napatay. Nakuha gikan sa suspetsado ang usa ka .45 caliber pistol ug mga pinaketeng gidudahang shabu.

Toledo

Duha ka patay’ng lawas sa mga lalaking nabulit og samad pinusilan sa kalawasan ang napalgan diha sa Sitio Canjuntic, Brgy. Matab-ang Dakbayan sa Toledo  kagahapon.

Giila ang mga gipatay mao sila si Markin Barcoma, 31, taga Sitio Lawas nga bukirong bahin sa maong barangay ug si Aldrin Reyes, 24, taga Sitio Tapon sa mao gihapong barangay. Ang duha pulos mga estambay.

Adunay mga nakadungog og walo ka sagunson nga buto sa armas alas-2 pasado sa kaadlawon ug dunay sakyanan nga paspas kaayong mibiya sa lugar. Narekober sa mga awtoridad sa crime scene  ang walo ka mga kabhang sa bala sa .45 nga kalibre sa armas.

Ang mga biktima apil sa watch list sa drug personalities sa Toledo.  (BANAT NEWS)