Dive site sa malapascua giungad sa barko

CEBU, Philippines - Nasangad kagahapon sa kadlawon ang dakung cargo vessel sa mabaw nga bahin sa Monad Shoal diin makita ang mga Thresher Sharks nga nag-unang bisitahon sa mga langyaw’ng turista sa Isla sa Malapascua sa Lungsod sa Daanbantayan.

Ang M/V Belle Rose nga rehistrado sa nasud sa Panama nagkarga kini og sinakong semento gikan sa Japan ug paingon unta kini sa Lungsod sa San Fernando dihang nahitabo ang insidente.

Si Gary Cases sa grupong Migo sa Iho, usa ka bantay dagat volunteer, ang nitaho sa insidente ngadto kang Baltazar Tribunalo, kasamtangang nangulo sa Provincial Environment and Natural Resources Office (PENRO) sa Sugbo. Ang barko gihulagway nga adunay gitas-on nga 183 metros ug usa ka bulk carrier vessel diin ang gross tonnage niini mokabat sa 29,104 gross tons.

Si Cases nihangyo kang Tribunalo nga mapadad-an og marine biologist gikan sa University of San Carlos nga motabang sa pag-imbestigar ug mo-assess sa danyos.

Sa report ni Cases ngadto kang Tribunalo niabot sa 480 metros ang gitas-on sa coral reef nga gidaro sa barko.

Matud ni Cases nga gagmay nga barko ang pwedeng mohakot sa kargamento aron walay laing masangad sa coral reef. Giingong dunay leak sa atubangang bahin sa barko apan wala sila makabantay og oil spill.

Sa laing bahin, gisusi usab karon sa PENRO kung diin gikan ang oil spill sa sapa sa Canlumampao, Dakbayan sa Toledo nga paingon sa dagat.

Samtang ang Environmental Management Bureau nagsusi usab sa laing oil spill sa Basdiot, Moalboal.

Gisuta sa ahensiya kung diin usab gikan ang maong lana aron mapasakaan og tukmang kaso ang responsable. (BANAT NEWS)