28 nadakpan sa drug raids

CEBU, Philippines - Miabot 28 ka tawo ang nadakpan sa managlahing operasyon sa kapolisan batok sa ilegal nga drugas.

Sa Sitio Mahayahay Brgy. Calamba, Dakbayan sa Sugbo napulo ka tawo ang nadakpan lakip ang gitumbok nga babayeng drug pusher nga si Anabelle Abellana nga naaktohang nag-repack pa og drugas. Nadakpan usab ang siyam ka mga tawo sud sa iyang balay nga giingong nanuyop.

Ang mga sakop sa City Anti-illegal Drug Special Operations Task (CAIDSOT) sa Cebu City Police Office (CCPO)  nga gipangulohan ni PSI Eunil Balili Avergonzado  mironda sa panimalay ni Abellana human adunay mipahibalo bahin sa mga lalaking nanuyop sud sa balay niini.

Nakuha sa maong operasyon ang tuo ka medium plastic sachet nga gituohang shabu, 18 ka gagmay pang pakete niini, drug paraphernalia ug digital weighing scale.

Samtang sa Sitio Tamboo, Brgy. Kawit sa Medellin, katorse ka tawo ang nadakpan ug usa ang naangol human napusilan sa mga polis  sa pagronda sa mga sakop sa Provincial Intelligence Branch (PIB) sa Cebu Provincial Police Office.

Matud pa ni Supt. Rodolfo Albotra ang hepe sa PIB nga usa ka Joel Gallardo ang napusilan sa tiil human giingong nisulay pagbunot sa iyang pistol, apan nakaeskapo ang magsuong target sa operasyon nga sila si Rodito ug Alvin Gallardo.

Si Rodito maoy ika upat nga anaa sa lista sa Lambat Sibat sa Medellin Police gumikan sa negosyo niini sa drugas.

Samtang nadakpan hinuon sud sa drug den ang 13 ka gipasanginlang manuyopay ug nakuha sa lugar ang 55 gramos nga shabu, usa ka .357 revolver gikan ni Joel ug mga drug paraphernalia.

Sa laing bahin, nadakpan sa Brgy. Tipolo sa Dakbayan sa Mandaue sila si Joseph Bongo,36, ug Dave Mark Catolong,18. Nasakmit gikan kanila ang usa ka medium pack ug 32 ka gagmay’ng pakete nga pulos dunay sud nga gidudahang shabu diha sa Semense Compound.

Nadakpan usab diha sa Brgy. San Isidro, Dakbayan sa Talisay sila si Ronel Vantiles, ug Raymond Juntilla nga pulos taga Dakbayan sa Naga ug giingong luwan og itom nga motorsiklo nga nakuhaan og 17 ka gagmay nga paketeng shabu. (BANAT NEWS)