Pagpatay sa habal-habal driver misteryoso

CEBU, Philippines - Napalgang patay ang habal-habal driver sa bakhawan sa Brgy. Manduyong, Badian alas 8:35 sa buntag kagahapon.

Ang biktima nailhan nga si Cherrynil Flotena Orillo, 36, taga Poblacion, Ronda kinsa nakaangkon og samad pinusilan sa tangkugo agi sa .9mm caliber pistol.

Si PO1 Noel Carallas nga nahinabi sa Banat News niingon nga misteryoso kung kinsa ang suspek ug ang motibo sa pagpatay kay giingong maayong tawo si Orillo ug walay kaaway.

Base sa inisyal nga imbestigasyon nga ang motor sa biktima gibilin lang sa daplin sa karsada nga may 50 metros ang gilay-on sa nahimutangan sa patay’ng lawas.

Wala usab nasayri sa kapolisan nganong naabot ang biktima sa maong dapit nga mingaw na kaayo ug walay mga balay. Gidala sa Badian District Hospital ang lawas apan patay na. (BANAT NEWS)