Nagbiseklita gipusil, ulo nikagay

CEBU, Philippines - Maayo’ng pagka-kagay sa ulo sa usa ka lalaki nga gidudahan nga tulisan human gipusil patay sa gunman nga nagsakay og motorsiklo sayo kagahapon sa buntag sa Pier Area, Dakbayan sa Sugbo.

Ang biktima nailhan lang sa alyas nga “Bolantoy” kinsa kapin sa 30-anyos nga gikataho’ng taga Villagonzalo II, Tejero.

Matud ni Senior Police Officer 3 Fiel Mendaros, imbestigador sa homicide section sa Cebu City Police Office, nga atol sa hitabo nagsakay sa bisekleta ang biktima.

Ang gunman nga nagsunod sa biktima nga nagsakay og motorsiklo ang kalit lang nitupad ug dayon pusil sa kilid sa ulo.

Nilapos ang bala sa ulo sa biktima hangtud nahagba sa karsada.

Human sa hitabo dali usab nga nisibat ang gunman sakay sa motorsiklo.

Suway pa unta nga gidala sa Cebu City Medical Center ang biktima apan patay na kini nga naabot sa mao’ng tambalanan.

Si Mendaros niingon nga sa ila’ng inisyal nga pagsubay sa kapolisan sa Mabolo Police ug Waterfront Police Stations ila’ng nasayran nga mangigoay usab diay sa mao’ng dapit ang biktima nga sagad nahimo’ng biktima niini mga pasahero sa barko.

Daku ang pagduda ni Mendaros nga lagmit igo lang gibawsan ang biktima sa iya nahimo’ng mga biktima. (BANAT NEWS)