Dul-an 5 mil ka bata mangalawat karon

CEBU, Philippines - Mokabat sa dul-an singko mil ka mga bata ang mangalawat sa labing unang higayon karong adlawa. Apan lahi sa ubang pagpangalawat, espesyal kini gumikan kay kabahin sa International Eucharistic Congress ang ilang First Communion ug anha kini pagabuhaton sa Cebu City Sports Complex.

Usa kanila si Nick Ryan Salazar, 13 anyos kinsa lumad nga taga Barangay Armeña, Lungsod sa Malabuyoc diin sukwahi sa uban nga kuyog ang mga ginikanan apan siya ang iyang  ikauban   mao iyang sponsor nga si Salvacion Endrina, 57.

Si Salazar, usa ka tinun-an sa Grade 5 sa Malabuyoc Elementary School diin gumikan sa kawad-on sa iyang mga ginikanan wala kini makahigayon sa pagpangumpisal kaniadto. Nasayran nga tulo silang magsuon apan ang ilang kinamaguwangan namatay maong sila na lang duha sa iyang igsuon karon uban sa ilang ginikanan.

Nagkanayon si Endrina, ang parokya nila sa San Nicolas de Tolentino sa Poblacion, Malabuyoc maoy nangita og sponsor alang kang Salazar diin usa siya sa ni-volunteer.

Dugang ni Endrina, kasamtangan sila nga nag-istar karon sa Dakbayan sa Talisay sa usa sa mga anak niini.

Ang First Communion kabahin sa kalihukan sa nagpadayon nga 51st International Eucharistic Congress diin moabot sa 4,812 ka mga bata ang makadawat sa una nila nga kalawat.

Si Msgr. Vicente Tupas Jr., kinsa maoy chairman alang sa 51st International Eucharistic Congress Catechesis miasoy nga dul-an sa 15 mil dala sa mga bata ug mga ginikanan ang lakip nga motambong sa misa unyang alas-4 sa hapon.

Ang selebrasyon pangulohan ni Cebu Archbishop Jose Palma uban sa kapin 300 ka mga Obispo ug liboan ka mga pari.

Nagkanayon si Tupas, mismo ang Obispo sa nagkadaiyang nasud sa kalibutan nga nitambong sa IEC mao ang mopakalawat sa mga bata.

Nasuta nga dunay mga quadrants nga gipamutang diin ipahimutang ang mga bata ug kun asa sila dapit nga mokalawat. Adunay 144 ka ludhanan diin sila moluhod pagdawat nila sa ostiya. Sa ground lang usab sa complex manglingkod ang mga bata uban sa ilang tagsa-tagsa ka mga ginikanan samtang ang mga delegado sa grandstand manglingkod ug sa luyo nga bahin mao ang mga pari.

Nibutyag usab si Tupas nga base sa ilang rekord, aduna'y usa ka langyaw gikan sa Estados Unidos ang nipadayag sa iyang gusto nga mag-first communion sa Sugbo human kini mi-convert sa relihiyong Romano Katoliko. (BANAT NEWS)