Venue sa statio orbis nalunopan

CEBU, Philippines - Mga opisyales sa simbahan ug opisyales sa Dakbayan sa Sugbo uban sa mga trabahante ang paspas nga nipasuyop sa tubig sa uwan nga napundo diha sa atubangang bahin sa San Pedro Calungsod Templete diha sa South Road Properties.

Ang lugar mao ang venue sa ipahigayon nga  Statio Orbis o ang culminating mass alang sa 51st International Eucharistic Congress (IEC)  ug gipaabot kini nga tambongan og kapin usa ka milyon ka tawo nga manimba.

Ang Banat News miduaw sa lugar nakaabot pa sa mga kawani uban sa mga opisyal sa siyudad nga nangita og paagi pagpahubas sa tubig.

Si Atty. Jose Marie Poblete, pangulo sa Department of Engineering and Public Works (DEPW) miangkon nga nagproblema sila sa nagpundong tubig sa   SRP.

Aron madali ang paghubas sa tubig, migamit sila og suction pump ug gipasuyop   padung sa kanal, apan di siya kapasalig nga mauga gyud kini para sa kalihokan ugma.

 “We are not promising a 100 percent solution kay dako man gyud og factor ang weather ani nga mopadayon sa pag-init, if things will be the same today hopefully magamay-gamay na lang ang atong problema sa tubig,” matud niya.

Gawas sa pagsuyop sa tubig, adunay dapit nga giabunohan inabagan sa mga pribadong sektor ug mga kontraktor nga gustong makatabang.

DOH nabalaka

Samtang gawas sa kagamhanan sa siyudad sa Sugbo mihimo usab og pakisusi ang Department of Health(DOH)-7 sa  lugar.

Si. Dr. Expedito Medalla, pangu sa Health Emergency and Management Staff (HEMS) miasoy nga magbutang sila og mga medical tents aron adunay moatiman sa mga tawong magkinahanglan og tabang medikal.

Nabalaka usab si Medalla sa nakitang tubig sa yuta ilabi na nga adunay mga wirings nga magkutay unya sa mga ekipo nga gamiton sama sa suga ug sound boxes.

Mihangyo siya sa katawhan nga huyang og resistensiya nga dili na lang moahat sa pag-adto sa dapit ug anha na lang sa telebisyon mag-monitor.

Parking Areas

Adunay paigo nga parkingan alang sa mga sakyanan sa mga tawong buot motambong sa Statio Orbis karong Domingo diha sa South Road Properties.

Mahimong parkingan ang SRP Kasadya Grounds, Senior Citizens Park,  ug dan Legaspi Extension, Mambaling Access Road(duol sa taytayan) ug sa SM Seaside.

Aduna say 15 ka Kaohsiung Buses alang sa pagkuha sa mga pilgrim ngadto sa giparkingan sa ilang bus paingon sa San Pedro Calungsod Templete diin mahitabo ang closing mass sa IEC.

Sugod alas-12 sa udto hangtud sa alas-4 sa hapon nga mohatod ang mga Kaohsiung bus ngadto sa venue.  (BANAT NEWS)