Arogante nga traffic enforcer imbestigahon na
CEBU, Philippines – Imbestigahon sa kadagkoan sa Cebu City Transportation Office (CCTO) ang traffic enforcer nga nakiglalis og batan-ong babaye nga igo lang mihangyo kaniya nga tabangan ang usa ka tiguwang aron kini makasakay og sakyanan.
Kining mao nga isyu nag-trending sa social media human nga si Glays Morgan mi-post sa iyang kasinatian sa Facebook hinungdan nga si Atty. Rey Gealon, executive director sa Cebu City Transportation Office mimando na sa traffic enforcer pagtubag sa reklamo.
Mihangyo si Gealon nga dili usa ibutyag ang ngalan sa traffic enforcer hangtod nga makapadangat kini sa iyang tubag kabahin sa reklamo ni Morgan kaniya.
Matud ni Morgan nga gusto lang niya nga patabangan sa traffic enforcer ang usa ka tiguwang aron mapasakay kini og sakyanan tungod sa kalayo sa lakwonon.
Si Morgan miingon nga misingka na hinuon ang traffic enforcer. Matud ni Gealon nga dili siya molaban sa iyang sakop kun nakahimo man gyud kini og kasaypanan pinaagi sa pag-inarogante sa batasan.
Matud ni Gealon nga ang traffic enforcer iyang gimandoan nga mosumiter sa iyang pagpasabot kabahin sa reklamo ni Morgan kaniya sulod sa 24 oras gikan sa pagkadawat niya sa kamandoan.
Ang mga imbestigador sa CCTO motimbang-timbang sa mga ebidensiya aron sutaon kun angayan ba nga silotan ang traffic enforcer nga matud pa nadestino diha duol sa Basilica del Santo Niño.
Samtang si Acting Cebu City Mayor Edgardo Labella mimando sa kadagkoan sa CCTO nga ayuhon ug paspasan ang pag-imbestigar sa maong kaso.
Matud ni Labella nga kinahanglan nga ang mga traffic enforcers magbaton og respeto sa katawhan nga bisan og ang mga drayber nga ilang masakpan nga nakahimo og kalapasan sa balaod sa tukmang pagmaneho og sakyanan dili nila angay nga singka-singkahan. – /RUB) (BANAT NEWS)
- Latest
