Gipatay sa kanhi polis

CEBU, Philippines - Patay ang usa ka lalaki nga gikasumbagay sa kanhi polis sa Neighborhood, Barangay Tabunok, Dakbayan sa Talisay niadtong Miyerkules sa gabii.

Ang biktima mao si Simeon Rabadon Jr., 38-anyos, ulitawo, samtang ang suspek nga iya ra sab silingan mao si Marco Agcol, 37, minyo.

Si SPO1 Mikie Espina sa Talisay City Police Station nitug-an sa Banat News nga ang biktima ug ang suspek aduna na’y daang panagbangi.

Ang duha nag-abot hinungdan nga nitumaw ang lalis ug nisangpot sa sinumbagay ug binulanay og tubo.

Ang suspek nga pwerte’ng lagota ang nibahad nga mobalik.

Asoy ni Espina nga si Agcol ang nisulod sa ilang giabangan nga balay ug nibalik nga armado og .45 caliber pistol.

Wala’y daghang estorya gipusil ni Agcol makadaghang higayon si Rabadon nga naigo sa iyang ulo ug kalawasan ug daling nisibat ang suspek.

Gidala sa Talisay City Hospital ang biktima ug gibalhin sa Vicente Sotto Memorial Medical Center apan nakabsan gyud sa kinabuhi.

Si Espina nitataw nga ang suspek aduna’y ranggo nga PO1 ug nataktak pagkapolis gumikan sa pagkapositibo niya sa ginadiling drugas. Katapusang assignment ni Agcol mao ang Pinamungajan Police Station.

Nagkanayon si Espina nga nagpahigayon pa sila og hot pursuit operation apan kun dili gyud masikop ang suspek, hayan ila’ng iduso ang kasong murder. (BANAT NEWS)