300 mil nagprosisyon

CEBU, Philippines - Gipilo maka-upat ka higayon ang gidaghanon sa mga tawo nga mikuyog sa “Walk with Jesus” kagahapon sa kaadlawon atol sa pagbukas sa kasaulogan sa kapistahan sa Senyor Sto. Niño  nga gihugopan sa 300 mil ka debotos itandi sa 70 mil sa miaging tuig.

Hinuon matud pa ni Chief Inspector David Señor, hepe sa Police Community Relations Branch sa Cebu City Police Office, malinawon nga napahigayon ang prosisyon bisan pa man naay natala nga usa ka insidente sa pagpanguot sulod sa Basilica Minore del Sto. Niño. Matud pa ni Señor nga misugwak ug misuyla ang mga tawo nga mikuyog sa prosisyon ug misimba sa basilica karong tuiga.

Iyang namatikdan nga may mga miadto sa Fuente Osmeña apan duna say nag-atang lang sa mga eskina sa mga dalan nga milagbas sa Osmeña Boulevard aron mosumpay sa mga niapil sa prosisyon.

Sa kadaghan sa mga tawo iyang gihulagway nga nakasulod na lamang ang ulohan sa prosesyon naa pa gihapon sa Visayas Community Medical Center ang tumoy niini.

“Pag-abot sa Sto. Niño (basilica) pormal kaayo, way dinumogay…karon hapsay kaayo,” matud ni Señor.

Matud pa niya nga nakatabang niini ang 180 ka polis nga gipakatap sa kadalanan ug ang mga force multipliers sa City Intelligence Branch ug sa Investigation and Detective Management Branch sa CCPO.  Usa sa gitumbok nga nakaingon sa pagsugwak sa mga tawo mao ang maayong dagan sa panahon.

Bisan si Fr. Jonas Mejares ang rector  sa basilica nagpasalamat sa gidaghanon sa mga tawong nitambong.

Sumala pa ni Mejares dako usab niyang kahinangop nga human sa duha ka tuig nga wa makatingog ang naguba nga bellfry sa basilica tungod sa 7.2 magnitude nadunggan kini pagbalik kagahapon.

Sa wali ni Mejares iyang    gihimug-atan ang kamahinungdanon nga isentro kanunay sa tawo sa tanan niining buhaton ang Ginoo ug kinahanglang tabangan kadtong mga nagkinahanglan. (BANAT NEWS)