Davide nabalaka nga di na sila makapamalit og heavy equipment
CEBU, Philippines – Si Gobernador Hilario Davide III nabalaka nga ang tinguha sa Kapitolyo nga mamalit og heavy equipment maabtan sa election ban kun mohimo pa sila og subli nga bidding.
Matud ni Davide nga dili siya supak nga mohimo og laing bidding sa pagpamalit og heavy equipment apan kinahanglang pamatud-an usa nga dunay sayop sa una nga bidding nga gihimo sa Bids and Awards Committee (BAC).
Matud ni Davide nga maghuwat siya kun unsay desisyon sa Cebu Provincial Board kabahin sa maong isyu. Sayo pa si Cebu Provincial Board Member Sun Shimura misugyot nga ang Kapitolyo mohimo og laing bidding sa pagpamalit og mga 20 ka heavy equipment.
Ang sugyot ni Shimura gihimo human nakabantay ang mga sakop sa Ad- Hoc Committee sa Cebu Provincial Board nga adunay mga palpak sa Technical Working Group (TWG).
Si Board Member Grecilda Sanchez, pangulo sa Ad-Hoc Committee, miingon nga duna sila’y nabantayan nga mga kwestyonable nga dukomento nga miagi sa TWG, apan mihangyo nga humanon usa nila ang imbestigasyon usa ibulgar ang ilang rekomendasyon.
Malaumon si Davide nga unta masulbad na ang isyu sa dili pa ang ban sa pagpatuman og mga proyekto kabahin sa nagsingabot nga eleksyon.
Ang pamaliton nga mga heavy equipment gamiton sa pagpatuman og mga infrastructure project sa kalungsuran sama sa farm-to-market roads. Matud ni Davide nga kun dili makapalit og mga heavy equipment ang probinsiya, mapugos sila pag-abang og mga heavy equipment ug mas dako pa unya ang magasto.
Si Bids and Awards Committee (BAC) chief Alex Tolentino miingon nga ang ConEquip Philippines, Inc. maoy gideklarar nga “lowest responsive bidder” pinaagi sa iyang P250.6 milyones alang sa mga 20 ka heavy equipment nga paliton.
Adunay ubang kompaniya nga miapil sa bidding ug mas ubos og kantidad nga gitanyag apan gi-disqualify sa BAC tungod kay wala makatuman sa gilatid nga mga rekisitos. – /RUB) (BANAT NEWS)
- Latest
