Naghikog human sa Pasko
CEBU, Philippines – Human sa Pasko, laing lalaki na usab ang nagpakamatay sa Zone Lato, Barangay Calawisan, Dakbayan sa Lapu-Lapu sa niaging Domingo sa buntag.
Matud ni PO3 Lydo Pinos, imbestigador sa Lapu-Lapu City Police Office nga si Allen Rabor, 35, ang nagpusil sa kaugalingon sulod sa iyang balay alas 10:30 sa buntag. Nakaangkon og samad pinusilan si Rabor sa tuong bahin sa ulo nga nilapos sa wala nga bahin.
Base sa pakisusi ni Pinos sa pamilya ni Rabor kinsa lumad nga taga San Fernando, Cebu, dili nila matino ang tinuod nga rason sa paghikog tungod kay maayo ra ang pagtagad niini kanila.
"Wala’y giingon kung unsa nga rason, wala’y suicide note nga gibilin," matud ni Pinos. Si Marwin Baguio, 34, igsuon sa kapuyo ni Rabor, nagkanayon sa polis nga samtang nagluto siya sulod sa iya’ng kusina, nakadungog siya og buto niadtong buntaga.
"Nagtuo siya nga pabuto ra. Nisumbong man ang usa ka 8-anyos nga anak ni Rabor ngadto ni Baguio nga iyang papa nagkadugo," dugang ni Pinos sa Banat News.
Si Baguio ug Rabor managsilingan ug dugang ni Pinos, ang 8-anyos nga batang lalaki kinsa anak sa naghikog ang nibalik sa ilang balay ug gikatahong nakadungog sab sa buto.
Tungod nakuryuso sa giingon sa bata, iyang giadto ang balay niini ug napalgang wala na’y kinabuhi si Rabor nga nahimutang sa sala.
Nagkanayon si Pinos nga nakit-an ni Baguio nga may tapad nga ilimnong makahubog si Rabor ug posibleng gikan kini nag-inom niadtong orasa.
Sa dugang imbestigasyon ni Pinos, nagkuyog si Rabor ug ang kapuyo sayo sa buntag sa mao’ng adlaw sa wala pa nahitabo ang insidente.
"Nagkuyog si Rabor ug live-in partner niya sayo sa buntag, ni-express daw sa iyang gibati nga mura’g nanamilit," dugang ni Pinos.
Na-recover sa kapolisan ang .45 caliber pistol, usa ka magazine ug usa ka kabhang sa crime scene.
Sa niaging Biyernes ug adlaw sa Pasko, usa ka lalaki nga bag-ong nakalaya sa Lapu-Lapu City Jail ang gikataho nga naghikog human nasayran nga ang iyang kapuyo adunay laing gimahal nga lalaki. – /GMR) (BANAT NEWS)
- Latest
